एजेन्सी – यो सिजन खराव प्रदर्शन गरिरहेको फ्रेन्च लिग वान क्लब मोनाको फ्रेन्च कपबाट बाहिरिएको छ । फ्रेन्च कप अन्तरगत मंगलबार राति भएको खेलमा घरेलु मैदानमा मोनाको दोस्रो डिभिजनको क्लब मेट्जसँग ३–१ ले पराजित हुदै कपको अन्तिम ३२ बाटै बाहिरिएको हो ।

मोनाकोलाई पराजित गर्न गाउथिर हेइन, मार्भिन गाक्पा र इब्राहिमा निएनले गोल गरे । मोनाकोका कप्तान राडामेल फल्काओले गोल गरेपनि टोलीको हार टार्न सकेन । घरेलु मैदानमा मोनाको गाउथिर हेइनको गोलबाट ३२औं मिनेटमा पछि परेको हो । उनले इब्राहिमा निएनको पासमा गोल गरेका थिए । ३९औं मिनेटमा कप्तान राडामेल फल्काओले गोल गर्दै खेललाई १–१ गोलको बराबरीमा ल्याएका थिए । उनले डिजेब्रिल सिदिवेको पासमा गोल गरेका थिए ।

पहिलो हाफ १–१ गोलको बराबरीमा सकिएपनि दोस्रो हाफमा घरेलु टोलीले बिर्सनलायक प्रदर्शन गर्दै दुई गोल खान पुग्यो । ६२औं मिनेटमा मार्भिन गाक्पाले हेइनको पासमा गोल गर्दै मेट्जलाई २–१ को अग्रता दिलाए । ७४औं मिनेटमा इब्रमहिमा निएनले गोल गर्दै मोनाकोलाई ३–१ ले स्तब्ध बनायो । एक साताअघि मात्रै इंग्लिस क्लब चेल्सीबाट मोनाको पुगेका सेस फाब्रिगास दोस्रो हाफमा मैदान छिरेपनि टिमलाई जिताउन सकेन ।

सन् २०१७ को लिव वान च्याम्पियन मोनाको यो सिजन लिग वानमा १५ अंक जोडेर रेलिगेसन जोनको १९औं स्थानमा रहेको छ ।