कार्डिफ (एजेन्सी)– रियल म्याड्रिड एवंम वेल्सका पूर्व प्रशिक्षक जोन टसहाकले गेराथ बेलले क्रिस्टियानो रोनाल्डोको उत्तराधिकारीका रुपमा आफुलाई प्रस्तुत गर्नुपर्ने बताएका छन् । पछिल्लो समय वेल्सका बेलले चोटका कारण धेरै जसो समय बेन्चमा बिताएका छन् ।

पछिल्ला केहि सिजन मैदान बाहिर बढी बस्नु परेका कारण उनी टोलीका लागि अपेक्षाकृत खेलाडी हुन सकेनन् । रोनाल्डोको बर्हिगमन पछि बेलले उनको ठाँउ लिने अनुमान गरिएको थियो ।

टसहाकले बेलले रोनाल्डोको भूमिका लिनुपर्ने बताएका छन् । मैदानको तल सम्म झरेर खेलका बारेमा अध्ययन गरे प्रभावकारी भूमिका खेल्न उनले बेललाई सुझाएका छन् ।

‘रोनाल्डो विड्गर हुन् । उनले गोल गर्ने अरुलाई गोलका लागि पनि भूमिका निर्वाह गरे,’ टसहाकले भने,’ बेल पनि सर्वकालिन उत्कृष्ट खेलाडी मध्येका एक हुन् । यदि उनी रियलमै रहन चाहन्छन् भने उनले रोनाल्डोले जे गरे त्यस्तै गर्न सक्नुपर्दछ । ‘

बेलले सफलता प्राप्त गर्नका लागि त्यहि अनुरुपको मेहनत गर्नपर्नेमा जोड दिदै टसहाकले चोट कारण बेल अभागी भएको बताए । ‘उनले जति गर्न सके त्यो भन्दा बढी गर्न सक्थ्ये । तर चोटले उनलाई गाह्रो पर्यो,’ उनले थपे, ‘चोटबाट फर्केर पुरानै अवस्थामा प्रदर्शन गर्न कठिन हुन्छ ।’

रोनाल्डोको प्रस्थानपछि रियलको आवश्यकता पूरा गर्न नसक्ने हो भने बेलले नयाँ क्लबबाट उच्च सुरुवात गर्नुपर्ने टसहाकले सुझाएका छन् ।