एजेन्सी – दक्षिण कोरियाले बहराइनललाई अतिरिक्त समयमा २–१ ले पराजित गर्दै एसियन कपको क्वाटरफाइनलमा स्थान बनाएको छ ।

एसियन कप अन्तर मंगलबार भएको खेलको निर्धारित समयको खेल १–१ गोलको बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयको थप गरिएको १५ मिनेटको इन्ज्युरी समयको दोस्रो मिनेटमा जिन सु किमले गोल गर्दै दक्षिण कोरियालाई २–१ को जित दिलाउँदै अन्तिम आठमा पुर्याए ।

युनाइटेड अरब इमिरेट्स (यूएई) स्थित अल रसिद स्टेडियममा भएको खेलको ४३औं मिनेटमा ही चान वाङले गोल गर्दै दक्षिण कोरियालाई खेलमा अग्रता दिलाएका थिए । उनले डि–बक्सको ठीक बाहिरबाट गरेको प्रहार सिधै गोलमा परिणत भएको थियो ।

७७औं मिनेटमा बहराइनका मोहम्मद मार्जुकले गोल गरेपछि खेल १–१ गोलको बराबरीमा पुगेको थियो । उनले क्लोज रेन्जबाट बराबरी गोल फर्काएका थिए । बराबरीपछि ७८औं मिनेटमा ही चान वाङको थ्रु पासमा लि योङले गोल गरेपनि रेफ्रीले अफसाइड दिएका थिए । खेलमा दक्षिण कोरियाले बल पोजेसन राखेपनि थप गोल गर्न नसक्दा खेल अतिरिक्त समयमा धकेलिएको थियो ।

अब दक्षिण कोरियाले कतार र इराकबीचको विजेतासँग खेल्नेछ । यसअघि चीन, इरान, भियतनाम, जापान, यूएई र अष्ट्रेलियाले अन्तिम आठमा स्थान बनाइसकेका छन् ।