सुनिल गाउँले

सिमरा – रुस्लान थ्री स्टार क्लब रुस्लान सिमरा गोल्डकप फुटबल प्रतियोगिताको सेमिफाइनलमा पुगेको छ । सिएमजी क्लब संकटलाई मंगलबार २–० ले हराउँदै थ्री स्टार सिमरा गोल्डकपको अन्तिम चारमा पुगेको हो ।

पहिलो हाफ र दोस्रो हाफमा एक एक गोल गर्दै सुदूरपश्चिम खप्तड गोल्डकपको उपविजेता थ्री स्टार सेमिफाइनल पुगेको हो । सेमिफाइनलमा थ्री स्टारले अर्को ए डिभिजन क्लब हिमालयन शेर्पाको सामना गर्ने छ ।

अफ्रिकन खेलाडी फोफाना फोडेले थ्रीस्टारका लागि खेलको १३ औं मिनटमा गोलको खाता खोलेका थिए । रञ्जन विष्टले डिबक्स भित्र निकालेको सुन्दर पासलाई फोडेले गोल गरेका थिए ।

पहिलो रोजाइमा नपरेका सुसान श्रेष्ठले थ्रीस्टारका लागि खेलको ८६ औं मिनेटमा गोल गरेका थिए । सुसान खेलको ७८ औं मिनटमा फोडेको ठाँउमा मैदान प्रवेश गरको थिए । थ्रीस्टारका रुपेश केसीले २५ यार्ड टाढाबाट प्रहार गरेको फ्रिकिक संकटाका डिफेण्डरले डिबक्सबाट क्लियर गर्न नसक्दा सुसानले त्यसको फाइदा उठाउँदै गोल गरे ।

खेलमा प्राप्त केहि अवसर सदुपयोग गर्न नसक्दा आठौं संस्करणको विजेता संकटा प्रतियोगिताबाट बाहिरियो । पहिलो हाफमा इन्जुरी समयको अन्तिम मिनटमा सरोज दाहालको प्रहार थ्रीस्टारका गोल रक्षक एलन न्यौपानेले रोके ।

सेन्टर लाइनबाट एकल प्रयासमा बल अघि बढाएका सरोजले डिबक्स बाहिरबाट गरेको सशक्त प्रहार विफल हुँदा पहिलो हाफमा बराबरी गर्ने अवसर चुकेको थियो । संकटाका अफ्रिकी खेलाडी क्रेडिक अब्बाले अर्को अवसर गुमाए । सेन्टर लाइनबाट अब्बाले अघि बढाएको बल पेनाल्टी बक्समा विपक्षी रक्षक डाम्बियाले क्लिएर गरे ।

थ्री स्टारले पनि गोलअन्तर बढाउने अवसर सदुपयोग गर्न सकेन । ५३ औं मिनटमा सुनिल बलको क्रस बल फोडेले खेर फाले । पेनाल्टी बक्समा पाएको अवसरलाई फोडेले फितलो प्रहार गर्दा संकटाका गोलरक्षक राजाबाबु थापाले रोके ।

५६ औं मिनटमा थ्री स्टारका रञ्जनको पास फोडेले खेर फाले । डिबक्स भित्र रञ्जनले निकालेको बललाई फोडेले सम्हाल्न नसक्दा बाहिरियो । यस्तै खेलको ७० औं मिनटमा रञ्जनले हेड गरेको बललाई संकटाका सरोजले गोललाईनबाट क्लियर गरे । बल पञ्च गर्न अघि बढेका संकटाका गोलकिपरलाई बिट गर्दै रञ्जनले हेड गरेका थिए ।

संकटाका प्रशिक्षक सल्यान खड्गीले शुरुवातमा गोल खाएपनि खेलमा फर्कन कठिन भएको बताए । आफ्नो खेलाडीले सोंचे अनुसारको प्रदर्शन गर्न नसकेको उल्लेख गर्दै प्रशिक्षक खड्गीले थ्रीस्टारका खेलाडीले भने उच्च प्रदर्शन गरेको बताए ।

ए डिभिजन लिगपछि थ्रीस्टारबाट बाहिरिएका खेलाडी निराजन खड्का पूर्व क्ल्बविरुद्ध उत्रेका थिए । संकटाका प्रशिक्षक खड्गीले निराजन क्लबसँग अनुबन्धनको प्रकृयामा रहेको जानकारी दिए ।

थ्री स्टारका प्रशिक्षक मेघराज केसीले लगातारको प्रतियोगिताका कारण खेलाडीले सोंचे अनुसारको प्रदर्शन गर्न नसकेको बताए । उनले लिगपछि टिममा केहि नयाँ खेलाडी आएको बताउँदै उनिहरु टिममा ‘एडजस्ट’ हुन बाँकी रहेको जनाए । केसीले सेमिफाइनलमा टोलीले प्रदर्शनमा सुधार गर्ने विश्वास व्यक्त गरे ।

थ्री स्टारका रक्षक आडामा डोम्बिया म्यान अफ दी म्याच घोषित भएर उनले १० हजार रुपैयाँ प्राप्त गरे । नवजनजागृति युवा क्लबको आयोजनामा जारी सिमरा गोल्डकपको दसौं संस्करणमा बुधबार पहिलो सेमिफाइनल आयोजक टोली र साविक विजेता त्रिभुवन आर्मी क्लबीच हुनेछ ।सिमरा गोल्ड कपको विजेताले ६ लाख र दोस्रो हुने टोलीले ३ लाख रुपैयाँ प्राप्त गर्नेछ ।