एजेन्सी – लन्डन क्लब चेल्सीले फरवार्ड अल्भेरो मोराटालाई स्पेनिस क्लब एट्लेटिको म्याड्रिडमा पठाएर युभेन्टस तथा एसी मिलानका फरवार्ड गोन्जलो हिगुआइनलाई अुनबन्ध गर्ने तयारी गरेको छ ।

चेल्सीले फरवार्ड मोराटालाई लोनमा एट्लेटिको म्याड्रिडमा पठाएर युभेन्टसबाट लोनमै एसी मिलान पुगेका हिगुआइनलाई अनुबन्ध गर्ने तयारी गरेको हो । सम्भवत मंगलबार नै मोराटा एट्लेटिको तथा हिगुआईन चेल्सीमा आउनेछन् ।

मोराटाले चेल्सीमा पहिलो रोजाईमा पर्न निकै संघर्ष गरिरहेको छन् । हिगुआइनलाई अनुबन्धन गर्न चेल्सीले मोराटालाई बाटो खुला गरेको छ । मोराटा सन् २०१७ मा रियल म्याड्रिडबाट चेल्सीमा पुगेका थिए । बार्सिलोना र सेभियाले अनुबन्ध गर्ने प्रयास गरेपनि मोराटालाई आफ्नो बाल्यकालको क्लबले नै अनुबन्ध इच्छा देखाएको हो । गोलडटकमका अनुसार २६ वर्षीय मोराटाले सबै प्रक्रिया पूरा भए शनिबार गेटाफेविरुद्धको खेलबाट एट्लेटिको मड्रिडबाट डेब्यु गर्नेछन् ।

यस्तै ३१ वर्षीय फरवार्ड हिगुआइनलाई चेल्सीले कारवाओ कपको सेमिफाइनलको दोस्रो लेगमा उपलब्ध गराउने गरी अनुबन्धन गर्ने प्रयास थालिरहेको छ । यसका लागि एसी मिलानले पियाटिकलाई लोनमै जिनोआबाट अनुबन्धन गर्ने प्रयास थालेको छ । हिगुआइन चेल्सीमा अनुबन्ध भए पूर्वप्रशिक्षक मौरिजियो सार्रीसँग पुर्नमिलन हुनेछ । हिगुआइनले सन् २०१६ मा सार्रीकै प्रशिक्षणमा नेपोलीबाट खेलेका थिए ।

बुधबारसम्ममा हिगुआइनलाई अनुबन्ध गर्न सके उनी टोटेनहमविरुद्धको खेलमा उपलब्ध हुनेछन् । पछिल्लो पाँच खेलमा चार गोल मात्रै गर्न सकेको चेल्सीले हिगुआइनको आगमन भए अग्रपङ्तिमा देखिएको समस्या समाधान हुने विश्वास लिएको छ ।