युभेन्टसको सहज जितमा रोनाल्डोको बिर्सनलायक प्रदर्शन

एजेन्सी – इटालियन सिरी ए अन्तर्गत सोमबार राति युभेन्टसले किएभोलाई पराजित गर्दै लिगमा अपराजित यात्रालाई निरन्तरता दिएको छ । घरेलु मैदानमा युभेन्टसले ३-० को सहज जित दर्ता गर्यो ।

खेलको १३ अौं मिनेटमा युभेन्टसले डग्लास कोस्टाको गोलमा अग्रता लिएको थियो । पहिलो हाफको अन्तिम मिनेटमा पाउलो डिबालाको पासमा एम्रे च्यानले गोल गर्दै युभेको अग्रता दोब्बर पारे । लिभरपुलबाट युभेन्ट्स गएयता उनको यो क्लबका लागि पहिलो लिग गोल थियो ।

दोस्रो हाफमा युभेन्ट्सले अग्रता बढाउने थुप्रै अवसर पाएपनि त्यसको भरपुर सदुपयोग हुन सकेन । क्रिस्टियानो रोनाल्डोको लागि भने दिन बिर्सनलायक रहयो । किएभोका मातिया बानिले पेनाल्टी क्षेत्रमा ह्याण्डबल गरेपछि प्राप्त पेनाल्टीमा रोनाल्डो गोल गर्न चुके । उनको प्रहारलाई गोलरक्षक स्टेफनो सोरेन्टिनोले बचाएका थिए । यसबाहेक खेलमा पनि उनी थुप्रै गोल गर्ने अवसरमा चुकेका थिए ।

खेलको ८२ औं मिनेटमा युभेन्ट्सले जित सुनिश्चित गर्यो । फेडेरिको बर्नार्डेसकीको फ्रिकिकमा ड्यानीएले रुगानीले गोल गर्दै ३-० को अग्रता दिलाए । यस जितसँगै युभेन्ट्सले शीर्ष स्थानमा ९ अंकको अग्रता कायम गरेको छ । २० खेलमा युभेले १८ जित र २ बराबरीसँगै ५६ अंक जोडेको छ । दोस्रो स्थानको नेपोलीको २० खेलमा ४७ अंक छ ।