एजेन्सी –चीन र भियतनामा युएईंमा जारी एसियन कप फुटबलको क्वाटरफाइनलमा प्रवेश गरेका छन् ।

चीनले एक गोलले पछि परेको स्थिति उल्ट्याएर थाइल्यान्डलाई २–१ ले पराजित गर्दै एसियन कपको अन्तिम आठमा पुग्न सफल भएको हो । यता, भियतनामले जोर्डनलाई पेनाल्टी सुटआउटमा पराजित गर्दै अन्तिम आठमा पुग्न सफल भयो ।

युएईंस्थित हाजा विन जायद स्टेडियममा आइतबार राति भएको खेलमा सुरुवाती अग्रता थाइल्यान्डले लिएको थियो । थाइल्यान्डका सुपाचाईं जाइडेडले गोल गर्दै थाइल्यान्डलाई अग्रता दिलाएका थिए । तर, थाइल्यान्डले त्यो अग्रता दोस्रो हाफमा कायम राख्न सकेन ।
६७औं मिनेटमा झि छियोलो चीनका लागि बराबरी गोल फर्काए । ७१औं मिनेटमा लिन गाओले पेनाल्टीमार्फत गोल गरेपछि चीनले खेलमा २–१ को अग्रता बनायो । त्यसपछि थप गोल निस्कन नसक्दा चीन विजयी हुन सफल भयो । अब चीनले क्वाटरफाइनलमा इरान वा ओमानबीचको विजेतासँग खेल्नेछ ।
आइतबार राति नै अर्काे खेलमा भियतनामले जोर्डनलाई पेनाल्टी सुटआउटमा ४–२ ले पराजित गर्दै क्वाटरफाइनलमा स्थान बनायो ।

निर्धारित समयको खेल १–१ गोलको बराबरीमा सकिएको थियो । त्यसपछि अतिरिक्त समयमा गोल निस्कन नसक्दा खेलको निर्णय पेनाल्टी सुटआउटबाट लिइएको हो ।
पेनाल्टी सुटआउटमा नोजोक हाइ क्यु, हुङ डुङ डो, लुवङ छ्वान त्रुङ र टिन डुङ बुईले गोल गरे । मिन भुङ ट्रानले गोल गर्न सकेनन् । जोर्डनका बाहा अब्दुलरहमान र अहमेद हामडौनीले मात्र गोल गर्न सकेन । बाहा फैजल अहमेद समिरले गोल गर्न सकेनन् ।
त्यसअघि अल मक्टम स्टेडियममा भएको खेलमा जोर्डनले खेलको ३९औं मिनेटमा बाहा अब्दुलरहमानको गोलबाट खेलमा अग्रता बनाएको थियो । ५१औं मिनेटमा कोङ फुङ न्युगेनले भियतनामका लागि बराबरी गोल फर्काएका थिए । अब भियतनामले जापान र साउदी अरेबियाबीचको विजेतासँग खेल्नेछ ।