सुनिल गाँउले
सिमरा – विशाल मेमोरियल गोल्ड कप जितेको २४ घन्टा नबित्दै रुस्लान सिमरा गोल्ड कप फुटबल प्रतियोगिताको सेमिफाइनलमा पुगेको छ । अर्को विभागिय टोली नेपाल एपिएफ क्लबलाई आइतबार ४–२ ले हराउँदै आर्मी अन्तिम चारमा पुगेको हो । अब आर्मीले फाइनल प्रवेशका लागि आयोजक नवजनजागृति युवा क्लबको सामना गर्नेछ ।

खेलमा दुई पटक सम्म लिएको अग्रता जोगाउन नसक्दा एपिएफ क्वार्टरफाइनलबाट बाहिरिएको हो । ३३ औं मिनेटमा राजन गुरुङको गोलबाट एपिएफले अग्रता लिएको थियो । तर ४३ औं मिनेटमा टंक बस्नेतको गोलबाट आर्मीले पहिलो हाफमा खेललाई बराबरी गरेको थियो ।

दोस्रो हाफ सुरु भएको दोस्रा मिनेटमा अशिष लामाको गोलबाट एपिएफले दोस्रो पटक अग्रता लिएको थियो । तर त्यो पनि लामो समय टिक्न सकेन । ७६ औं मिनेटमा दीपक गुरुङले बराबरी गोल फर्काए ।

खेलको अन्त्यतिर आर्मीले अरु दुई गोल थप्दै खेल सहजै आफ्नो पक्षमा पारेको थियो । आर्मीका लागि ८६ औं मिनेटमा सुदिल राईले गोल गरे भने इन्जुरी समयको पहिलो मिनेटमा टंकले गोल गरेका थिए ।

एपिएफका प्रशिक्षक रत्नकाजी महर्जनले अग्रतापछि रक्षात्मक खेल्न खोज्दा पराजय बेहोर्नु परेको बताए । ‘आर्मी आँफैमा सशक्त टिम भएकाले रक्षात्मक खेल्नु आवश्यक थियो’ महर्जनले भने । दोश्रो हाफमा बराबरीपछि आर्मीको आक्रामक खेललाई रोक्न नसक्दा पराजय बेहोरेको उनले बताए ।
आर्मीका प्रशिक्षक नविन न्यौपानेले जित हासिल गरेपनि खेलाडीले सोंचेजस्तो प्रदर्शन गर्न नसकेको बताए । शनिवार मात्र वीरगञ्जमा फाइनल खेलेकाले खेलाडी थाकेको उनको भनाई थियो । अर्को खेलमा परिष्कृत खेल प्रदर्शन गर्ने उनले बताए ।

आर्मीका दीपक खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।
प्रतियोगितामा सोमबार खप्तड गोल्डकपको विजेता नेपाल पुलिस क्लब र हिमालयन शेर्पा क्लबबीच प्रतिस्पर्धा हुनेछ ।

नव जनजागृति क्लबको आयोजनामा जारी प्रतियोगिताको विजेताले ६ लाख तथा उपविजेताले ३ लाख नगद प्राप्त गर्नेछ ।