एजेन्सी – इंग्लिस प्रिमियर लिग फुटबलमा ७ गोल भएको खेलमा वल्भ्सले लेस्टर सिटीलाई पराजित गरेको छ । गोलको वर्षा भएको खेलमा घरेलु टोली वल्भ्सले लेस्टरसिटीलाई ४–३ को गोल अन्तरले हराएको हो ।

घरेलु मैदानमा वल्भ्सलाई जिताउन डिएगो जोटाले ह्याट्रिक पूरा गर्दा रायन बेन्नेटले एक गोल थपे । लेस्टरका लागि डिमाराई ग्रे र वेस मोगार्नले गोल गर्दा एक गोल उपहार पाएको थियो ।
जोओ मौटिन्होको पासमा खेलमा चौथो मिनेटमा नै डिएगो जोटाको गोलबाट घरेलु टोली वल्भ्सले अग्रता बनाएको थियो । १२औं मिनेटमा जोओ मौटिन्होकै पासमा रायन बेन्नेटले गोल गरेपछि वल्भ्सले खेलमा २–० को अग्रता लिन सफल भयो ।

पहिलो हाफमा २–० ले अघि रहेको वल्भ्सले दोस्रो हाफको सुरुवाती ६ मिनेटमा दुई गोल बेहोरेपछि खेल २–२ को रोमाञ्चक मोडमा पुगेको थियो । ४७औं मिनेटमा डिमाराई ग्रेले गोल गर्दै गोल अन्तरमा २–१ मा झारेका थिए । ५१औं मिनेटमा कोनर कोएडीले आत्मघाती गोल गरेपछि लेस्टर खेलमा फर्किएको थियो ।
६४औं मिनेटमा रुवेन नेभेसको पासमा जोटाले टिमका लागि तेस्रो तथा व्यक्तिगत दोस्रो गोल गरेपछि पुन वल्भ्सले खेलमा ३–२ को अग्रता बनायो । ८७औं मिनेटमा वेस मोर्गानले गोल गरेपछि खेल ३–३ गोलको बराबरीमा पुगेको थियो । बराबरीतर्फ धकेलिएको खेलको इन्ज्युरी समयको थप गरिएको तेस्रो मिनेटमा जोटाले ह्याट्रिक गोल गर्दै टिमलाई ४–३ को रोमाञ्चक र प्रतिस्पर्धात्मक जित दिलाए ।
जितसँगै वल्भ्स २३ खेलबाट ३२ अंक जोडेर आठौं स्थानमा रहँदा समान खेलबाटै ३१ अंक जोडेको लेस्टर नवौं स्थानमा छ ।