धनगढी (हाम्रो खेलकुद) – नेपाल पुलिस क्लबका मिडफिल्डर रवी पासवान तेस्रो सुदूरपश्चिम खप्तड गोल्डकपको सर्वोत्कृष्ट खेलाडी घोषित भए । पुलिसलाई उपाधि दिलाउन महत्त्वपूर्ण भूमिका निर्वाह गरेका उनले १ सय ५० सिसिको मोटरसाइकल प्राप्त गरे ।

यसअघि नेपाली राष्ट्रिय टोलीको प्रारम्भिक टोलीमा पटक पटक परेका रवीले सर्वोत्कृष्ट खेलाडीको उपाधि जितेपछि हाम्रो खेलकुदसँग बोल्दै राष्ट्रिय टोलीमा पर्न मिहिनेत गर्ने बताए । ‘मैले यसअघि पटक पटक राष्ट्रिय टोलीको प्रारम्भिक चरणमा परें । अहिले थप मिहिनेत गरेर राष्ट्रिय टोलीमा नै स्थान बनाउने प्रयासमा छु । त्यसको लागि क्लबमा आफ्नो प्रदर्शन सुधार्ने र क्लबलाई सफलता दिलाउन प्रयास गर्नेछु,’ उनले भने ।

मोफसलकै सर्वाधिक धनराशीको खप्तड गोल्डकपको उपाधि दिलाउन सक्दा मनोबल बढेको उनले बताए । ‘ लिगमा हाम्रो प्रदर्शन राम्रो भएको थिएन । आफ्नो गल्तीले नै लिगमा केहि खेलहरु गुमायौं । मोफसलमा ती गल्तिहरु सुधार्ने लक्ष्य थियो र त्यसको नतिजा नै यस उपाधि जित्न सफल भयौं,’ पासवानले भने ।

पुलिस आउनुअघि मनाङ मर्स्याङदी क्लबमा खेलेका पासवानले पुलिसमा आफ्नो प्रदर्शन सुध्रिएको बताए । ‘ मनाङमा हुँदा एकदम कम अवसर पाउने गर्थे । खेल्ने निकै कम समयमा आफ्नो प्रतिभा देखाएपनि नियमित खेल्न पाइएन । अहिले पुलिसम राम्रो प्रदर्शन गरिरहेको छु । प्रशिक्षकको योजना अनुसार खेलेका छौं । सिनियर र जुनियरको राम्रो तालेमलले नतिजा पनि हासिल गरेका छौं,’ उनले टुंग्याए ।