वीरगन्ज (हाम्रो खेलकुद)– विभागिय टोली त्रिभुवन आर्मी क्लबले विशाल मेमोरियल गोल्डकप फुटबल प्रतियोगिताको उपाधि जितेको छ । ‘ए’ डिभिजन प्रतिद्धन्द्धी हिमालयन शेर्पा क्लबलाई सडन डेथमा हराउँदै आर्मी च्याम्पियन बनेको हो ।

वीरगन्जस्थित नारायणी रंगशालामा शनिबार भएको उपाधि भिडन्तमा निर्धारित समयको खेल १–१ गोलको बराबरीमा सकिएपछि टाइब्रेकरमा पनि बराबरी भएपछि सडनडेथमा विजयी भएको थियो । आर्मीले ६–५ ले विजयी बनेको थियो ।
पेनाल्टी सुटआउटमा आर्मीका सन्तोष तामाङ, भरत खवास, दीप लामा, विकेश कुथु, विवेक बस्नेत र टेक बहादुर बुढाथोकीले गोल गरे । दीपक गुरुङको प्रहार बाहिरिएको थियो । शेर्पाका विश्वास श्रेष्ठ, रवि थापा, विजय श्रेष्ठ र अलरिच सिवेले गोल गरे । आशिष गुरुङ र प्याट्रिक गोहाले पेनाल्टीमा गोल गर्न सकेनन् ।
त्यसअघि विश्वास श्रेष्ठको गोलबाट हिमालयन शेर्पाले खेलमा अग्रता बनाएको थियो । तर, आर्मीका सन्तोष तामाङले बराबरी गोल फर्काएका थिए । त्यसपछि थप गोल निस्कन नसक्दा खेल पेनाल्टी सुटआउटमा धकेलिएको थियो ।
च्याम्पियन बनेसँगै आर्मीले उपाधिसहित ५ लाख ५५ हजार ५ सय ५५ रुपैयाँ प्राप्त गर्यो । शेर्पाले २ लाख ७७ हजार ७ सय ७७ रुपैयाँ प्राप्त गर्यो । विशाल मेमोरियल फाउन्डेसनको आयोजनामा भएको प्रतियोगितामा ८ टोलीको सहभागिता रहेको थियो ।

विशाल मेमोरियल गोल्डकपमा च्याम्पियन बनेको आर्मीले २४ घन्टा नबित्दै सिमरा गोल्डकपको क्वार्टरफाइनलमा आइतबार अर्को विभागिय टोली नेपाल एपिएफ क्लबको सामना गर्नेछ ।

विशाल मेमोरियल गोल्डकप फुटबल प्रतियोगिताका उत्कृष्ट

-सर्वाेत्कृष्ट खेलाडीः विश्वास श्रेष्ठ (शेर्पा)
-उत्कृष्ट फरवार्डः विश्वास श्रेष्ठ (शेर्पा)
-मिडफिल्डरः सन्तोष तामाङ (आर्मी)
-डिफेन्डरः दीपक गुरुङ (आर्मी)
-गोलरक्षकः विकेश कुथु (आर्मी)
-प्रशिक्षकः नवीन न्यौपाने (आर्मी)