एजेन्सी – साविकको विजेता बायर्न म्युनिखले शीर्ष स्थानमा रहेको बोरुसिया डर्टमन्डसँगको अंक दुरी छोट्याएको छ । विन्टर ब्रेकपछिको पहिलो खेलमा बायर्नले टीएसजी होफेनहाइनलाई ३–१ ले पराजित गर्दै शीर्ष स्थानमा रहेको डर्टमन्डसँगको अंक दुरी ३ मा झारेको हो ।

बायर्नको १८ खेलबाट ३९ अंक पुगेको छ । एक खेल कम खेलेको डर्टमन्डको ४२ अंक छ । डर्टमन्डले आज राति आरबी लेपिजिजसँग प्रतिस्पर्धा गर्दैछ । यस खेलमा जित हात पारे डर्टमन्डले फेरि ६ अंकको नै अग्रता बनाउनेछ ।

होफेनहाइनको घरेलु मैदानमा शुक्रबार राति भएको खेलमा बायर्नलाई जिताउन लियोन गोरेट्ज्काले २ तथा रोबर्ट लेवान्डोस्कीले १ गोल गरे । घरेलु टोलीका लागि निको स्कुल्नले एक गोल फर्काए ।
बायर्नले खेलको ३४औं मिनेटमा गोरेट्ज्काको गोलबाट खेलमा अग्रता बनाएको थियो ।

पहिलो हाफको इन्ज्युरी समयको थप गरिएको पहिलो मिनेटमा गोरेट्ज्काले नै गोल गर्दै बायर्नको अग्रता दोब्बर बनाएको थियो । उनले डेभिड अलवाको पासलाई गोलमा परिणत गरेका थिए ।

५९औं मिनटेमा घरेलु टोलीका निको स्कुल्जले गोल गर्दै खेललाई २–१ म ल्याउदै खेलमा फर्कने संकेत दिएका थिए । तर, खेल सकिन ३ मिनेट बाँकी रहँदा थोमस मुलरको पासलाई सदुपयोग गर्दै रोबर्ट लेवान्डोस्कीले गोल गर्दै बायर्नलाई ३–१ को जित दिलाए । बायर्नसँग पराजित होफेनहाइन २५ अंक जोडेर सातौ स्थानमा छ ।