एजेन्सी – पहिलो लेगमा २–१ ले पछि परेको बार्सिलोनाले लेभान्टेमाथि दोस्रो लेगमा ३–० को पुनरागमन जित निकाल्दै कोपा डेल रे फुटबलको क्वाटरफाइनलमा स्थान बनाएको छ ।

बार्सिलोनाले समग्रमा ४–२ को जित निकाल्दै आन्तिम आठमा पुग्न सफल भएको हो । घरेलु मैदान क्याम्प नोउमा बिहीबार राति भएको खेलमा बार्सिलोनालाई जिताउन औसमान डेम्वेलेले २ तथा कप्तान लियोनल मेस्सीले एक गोल थपे ।

पहिलो हाफमा २ तथा दोस्रो हाफमा १ गोल सम्भव भएको थियो । लेभान्टेलाई सुरुवातदेखि नै दवावमा राखेको बार्सिलोनाले खेलको ३०औं मिनेटमा डेम्वेलेको गोलबाट अग्रता बनाएको थियो । कप्तान लियोनेल मेस्सीको पासमा डेम्वेलेको प्रहार सर्जियो पोस्टिगोले क्लियर गर्न खोजेपनि असफल बन्यो ।

लगत्तै ३१औं मिनेटमा डेम्वेलेले मेस्सीकै पासमा अर्काे गोल थप्दै बार्सिलोनाको अग्रता दोब्बर बनायो । ५४औं मिनेटमा कप्तान लियोनेल मेस्सीले गर्दै बार्सिलोनालाई ३–० को जित दिलाउदै क्वाटरफाइनलको यात्र तय गराए । मेस्सीले नेल्सन सोमिडेको पासलाई सदुपयोग गरेका थिए ।

बिहीबारै भएको अर्काे खेलमा इस्पान्योलले भिल्लारियललाई ३–१ ले पराजित गर्दै क्वाटरफाइनलमा प्रवेश गर्न सफल भएको छ । इस्पान्योलले समग्रमा ५–३ को जित निकालेको हो । अर्काे खेलमा रियल बेटिसले रियल सोसिडाडलाई खवे गोलमा पछि पार्दै क्वाटरफाइनलमा स्थान बनाउन सफल भयो । खेल २–२ गोलको बराबरीमा सकिएको थियो ।