एजेन्सी – एक गोलले पछि परेको स्थिति उल्ट्याउदै जापानले एसियन कप फुटबलमा उज्वेकिस्तानलाई २–१ ले पराजित गरेको छ । समूह ‘एफ’ को अन्तिम चरणका खेलमा उज्वेकिस्तानमाथिको जितसँगै जापानले समूहमा शत प्रतिशत जित निकाल्यो ।

युएईंस्थित खालिफा विन जायद स्टेडियममा बिहीबार भएको प्रतिस्पर्धात्मक खेलमा जापान खेलको ४०औं मिनेटमा पछि परेको थियो । इल्डोर सोमुरोडोभले गोल गर्दै उज्वेकिस्तानलाई सुरुवाती अग्रता दिलाएका थिए । उनले डस्टनवेक खाम्दामोभको पासलाई गोलमा परिणत गरेका थिए ।
एक गोलले पछि परेको तीन मिनेटपछि नै जापानले बराबरी गोल फर्कायो । जापानका लागि यासीनोरी मुटोले सेइ मुरोयाको पासलाई सदुपयोग गर्दै बराबरी गोल फर्काए । ५८औं मिनेटमा टिसुकासा सियोतानीले गोल गर्दै जापानलाई २–१ को जित दिलाए ।

जितसँगै जापानले शतप्रतिशत जितसहित ९ अंक जोड्यो । जापानसाग पराजित भएपनि उज्वेकिस्तान समूहमा ६ अंक जोडेर समूह उपविजेताको रुपमा अन्तिम १६ मा पुग्न सफल भयो ।
यही समूहको अर्काे खेलमा ओमानले तुर्केमिनिस्तानलाई ३–१ ले पराजित गर्न सफल भयो । ओमानको जितमा अहमेद अल महाजरी, मोसिन अल घसानी र मोहम्मेद अल मुसालामीले गोल गरे । तुर्केमिनिस्तानमा अल्ट्यामुरदले एक गोल फर्काए । ओमानले समूहमा पहिलो जित निकाल्दा तुर्केमिनिस्तान जितविहीन बन्यो ।