धनगढी (हाम्रो खेलकुद) – सीएमजी क्लब संकटालाई टाइब्रेकरमा ५-४ ले पराजित गर्दै नेपाल पुलिस क्लब तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपको फाइनलमा प्रवेश गरेको छ ‌। निर्धारित समयमा खेल गोलरहित बराबरीमा सकिएपछि टाइब्रेकरमा खेलको निर्णय लिइएको हो ।

बुधबार धनगढी रंगशालामा भएको निकै प्रतिस्पर्धात्मक खेलको १३ अौं मिनेटमा पुलिसका अभिषेक रिजालको क्रसमा तिर्थ रानाको हेडरले पोस्टको दिशा लिन सकेन । २७ अौं मिनेटमा संकटाले अग्रता लिने सुवर्ण अवसर गुमायो । सुभाष गुरुङको पासमा एलोन म्याक्सवेलले वन भर्सेस वनमा गरेको प्रहारलाई पुलिसका गोलरक्षक शत्रुघन चौधरीले सहजै बचाए ।

४२ अौं मिनेटमा तेज तामाङको क्रसमा अभिषेक रिजालको प्रहारलाई संकटाका गोलरक्षक राजाबाबु थापाले उत्कृष्ट डाइभ दिँदै विफल पारे ।

दोस्रो हाफमा दुवै टोलीले अपेक्षित रुपमा अाक्रमक मुभ बुन्न सकेनन् । संकटा ८०अौं मिनेटमा अग्रता लिनबाट चुक्यो । पुलिसका गोलरक्षक शत्रुघन चौधरीले पन्च गरेपछि पोजिसनमा नहुँदा सुभाष गुरुङले गरेको प्रहारले पोस्टको दिशा लिन सकेन । ८५ अौं मिनेटमा पुलिसका रवी पासवानको क्रसमा निरकुमार राईको प्रहारलाई गोलरक्षकले सहजै बचाए ।

टाइब्रेकरमा संकटाका अमित तामाङ, लक्ष्मण रुचाल, एलोन म्याक्सवेल र सरोज दाहालले गोल गरे । पाँचौ प्रहारमा सुभाष गुरुङको प्रहार पुलिसका वैकल्पिकगोलरक्षक रोशन खड्काले बचाए । पुलिसका अभिषेक रिजाल, अजित भण्डारी, हरि कठायत, तिर्थ राना र विक्रम धिमाल पेनाल्टीमा सफल भए ।

यस जितसँगै विजयी टोलीले प्रतियोगिताको उपाधि भिडन्तमा शनिबार रुस्लान थ्री स्टारको सामना गर्ने भएको छ । मोफसलकै सर्वाधिक धनराशी पुरस्कार भएको प्रतियोगिताको विजेताले २१ लाख रुपैयाँ प्राप्त गर्नेछ । उपविजेताले १० लाख प्राप्त गर्दा विधागत उत्कृष्टतर्फ प्रत्यक खेलाडीले १५ हजार रुपैयाँ पाउनेछन् ।