एजेन्सी – पछिल्लो समय रियल म्याड्रिडको पहिलो रोजाइमा पर्न संघर्ष गरिरहेका मिडफिल्डर इस्कोलाई रियलक पूर्व खेलाडी राफेल भान डर भार्टले सर्वोत्कृष्ट खेलाडी रहेको बताएका छन् ।

प्रशिक्षक सान्टियागो सोलारीको आगमनसँगै इस्कोले अधिकांश समय बेन्चमा नै बस्नुपर्ने अवस्था रहेको छ । इस्को पछिल्लो समय रियल छाडेर अन्यत्र जाने हल्ला चलीरहँदा पनि सोलारीले उनलाई आफ्नो पहिलो रोजाइमा राखेका छैनन् । जारी सिजन इस्कोले लिगमा ५ खेल मात्र सुरुवाती रोजाइमा खेलेका छन् ।

२६ वर्षीय मिडफिल्डर इस्कोले बुधबार लेगानेसविरुद्ध भएको कोपा डेल रेको खेल सुरुवाती रोजाइमा खेलेका थिए । तर रियल १-० ले पराजित भयो । उक्त खेलमा पराजित भएपनि पहिलो लेगमा ३-० ले जितेका कारण रियल समग्रमा ३-१ को जित दर्ता गर्दै अर्को चरणमा भने पुगेको छ ।

रियलका पूर्व खेलाडी भान डर भार्टले इस्कोले रियलमा अवसर नपाएको देख्दा आफू आश्चर्यचकित भएको बताएका छन् । ‘ मलाई आश्चर्य लागेको छ । इस्को सर्वोत्कृष्ट खेलाडी हुन् । उनको हरेक प्रशिक्षकसँग केहि समस्या हुने गरेको छ । जिदान हुँदा पनि उनको राम्रो सम्बन्ध रहेन,’ उनले भने, ‘मा जब रियलको खेल हें जान्छु उनले खेलेको छन् वा छैन हेर्छु । उनले पहिलो रोजाइमा खेलेनन् भने म घर फर्कन्छु ।’

गतवर्ष जिदानले रियल छाडेपछि जुलेन लोपेटेगुई क्लबका प्रशिक्षकमा नियुक्त भएका थिए । लोपेटेगुई ३ महिनामै बर्खास्त भएपछि रियलले सोलारीलाई जिम्मेवारी सुम्पिएको थियो । नोभेम्बरमा नियुक्त भएयता सोलारीले पनि अपेक्षित नतिजा दिलाउन सकेका छैनन् ।