एजेन्सी – भारतीय फुटबल टिमका मुख्य प्रशिक्षक स्टेफन कन्सटेनटाइनले पदबाट राजीनामा दिएका छन् । एसियन कपअन्तर्गत समूह चरणको अन्तिम खेलमा बहराइनसँग १–० ले पराजित भएपछि कन्सटेनटाइनले सोमबार मुख्य प्रशिक्षकबाट राजीनामा दिएका हुन् ।

भारत समूह ‘ए’ मा ३ अंक जोडेर पुछारमा रहेको थियो । बेलयाती प्रशिक्षक कन्सटेनटाइनले प्रशिक्षक पद छाड्नु उपयुक्त समय भएको बताएका छन् । ‘मैले यो खेलपछि भारतीय टिमको मुख्य प्रशिक्षक पदबाट राजीनामा दिएको छु । म यहाँ चार वर्षसम्म रहे । मेरो लक्ष्य भारतलाई एसियन कपमा छनोट गराउनु थियो । त्यसमा म सफल भए । तर, एसियन कपमा प्रदर्शन राम्रो हुन सकेन,’ प्रशिक्षक स्टेफनले राजीनामा दिदै भने, ‘यो चार वर्षको अवधिमा मलाई साथ दिने सम्पूर्ण खेलाडी र भारतीय फुटबल संघलाई विशेष धन्यवाद दिन चहान्छु । जसले मलाई चार वर्षसम्म विश्वास गरेर टिममा स्थान दिइरह्यो ।’

भारतले पहिलो खेलमा थाइल्यान्डलाई ४–१ ले पराजित गरेको थियो । दोस्रो खेलमा युएईंसँग २–० ले पराजित भएको थियो । कन्सटेनटाइनले यसअघि सन् २००२ देखि २००५ सम्म भारतीय टिमलाई नै प्रशिक्षण दिएका थिए । सन् २०१५ मा कन्सटेनटाइन पुन: भारतीय फुटबल टिमको मुख्य प्रशिक्षकमा नियुक्त भएका थिए । स्टेफन नेपाली टिमको समेत मुख्य प्रशिक्षक बने ।

‘मेरो यात्रा यही सम्मको रहेछ । यो चार वर्षको अवधिमा मैले थुप्रै पाएको छु । टिम छाड्दा मलाई निकै खल्लो महसुस भइरहेको छ । अब मैले मेरो परिवारलाई पनि समय दिनुपर्नेछ । म करिव ६ वर्षदेखि परिवारसँग बस्न पाएको छैन । मेरो श्रीमतीको आज जन्मदिन थियो । मेरो तीन छोरीलाई मैले तीन महिना अघि मात्रै सामाजिक सञ्जालमा हेर्ने मौका पाएको थियो,’ पोस्टम्याचमा स्टेफनले भने । उनले यसो भनिरहँदा उनको आशु थामिएको थिएन ।