टुरिन (एजेन्सी) – युभेन्ट्सका स्टार पाउल डीबालाले पेरिस सेन्ट जर्मेनका स्टारद्वय केलियन एमबाप्पे र नेयमार भविष्यमा क्रिस्टियानो रानाल्डो र लियोन मेसीको उत्तराधिकारी बन्न सक्ने अनुमान लगाएका छन् । रानोल्डो र मेसीले बुट थन्क्याएपछि यी दुईले त्यो ठाँउ लिन सक्ने उनको विश्वास रहेको छ ।

डीबालाले मेसी र रोनाल्डो दुवैसँग खेलिसकेका छन् । त्यस्तै उनी नेयमार र एमबाप्पेविरुद्ध पनि खेलिसकेका छन् । अर्जेन्टिनाका स्टार डीबालाले नेयमारका बारेमा भने, ‘नेयमार विश्वका उत्कृष्ट खेलाडी बन्ने बाटोमा छन् । उनी साच्चै प्रतिभावान छन् । म उनको प्रदर्शनबाट हरेक पटक चकित परेको छु । उनी उत्कृष्ट खेलाडी बन्ने बाटोमा छन् किनकि आउने दिनमा अझै थ्रुपै सफलता दिलाउनेछन् ।’

अर्जेन्टिनाका २५ वर्षे फरवार्ड डीबालाले एमबाप्पेका बारेमा भने, ‘एमबाप्पे मोनाकोमा हुँदा मैले उनीविरुद्ध खेलेको छु । युवा अवस्थामै उनले आफ्नो क्षमता प्रदर्शन गरिसकेका छन् । उनी ठूला खेलाडी बन्नेछन् । उनले विश्वकप जितिसकेका छन् । रसियामा फ्रान्सलाई विश्वकप दिलाउने क्रममा उनको प्रदर्शन उच्च रह्यो । उनीले लामो यात्रा तय गर्न बाँकी छ । उनले आफुलाई रोनाल्डो र मेसी जस्तै अलग रुपमा आफुलाई उभ्याउन सक्नेछन् । ‘

डीबालाले रोनाल्डोसँग युभेन्ट्समा सँगै खेलेका छन् । त्यस्तै मेसी र उनले अर्जेन्टिनाका लागि सँगै खेलेका छन् । म आफुलाई भाग्यमानी ठान्छु किनकी क्लबमा रोनाल्डो र राष्ट्रिय टोलीमा मेसीसँग खेलेको छु । तर, यी दुई खेलाडीबीच तुलना गर्न भने कठिन छ । दुवैमा अलग अलग विशेषता छ । दुवैले लामो समयदेखि उच्च प्रदर्शन गरिरहेका छन् । डीबालाले यो सिजन १० गोल गर्नुका साथै २ गोलमा एसिस्ट गरेका छन् ।