वेम्वली (एजेन्सी) – इंग्लिस प्रिमियर लिग फुटबलमा टोटेनहम हस्टपरल म्यानचेस्टर युनाइटेडसँग हार बेहोरेको छ । टोटेनहम घरेलु मैदानमा म्यानचेस्टर युनाइटेडसँग १–० ले पराजित भएको हो ।

टोटेनहमको घरेलु मैदान वेम्वलीमा आइतबार राति भएको खेलमा युनाइटेडको जितमा मार्कुस रासफोर्डले पहिलो हाफमा गरेको गोल नै निर्णायक बन्यो । निकै नै रोमाञ्चक र प्रतिस्पर्धात्मक बनेको खेलको ४४औं मिनेटमा रासफोर्डले पल पोग्वाको लामो पासलाई नियन्त्रणमा लिदै गोल गर्न सफल भएका थिए ।

एक गोलले पछि परेपछि घरेलु टोलीले युनाइटेडलाई दवावमा राखेपनि टोटेनहम गोल गर्नबाट असमर्थ बन्यो र लिगमा हार बेहोर्न पुग्यो । टोटेनहमले युनाइटेडको पोस्टमा २१ सट प्रहार गरेपनि गोलरक्षक डेभिड हे जिया लगातार बाधक बने ।
अन्तरिम प्रशिक्षक ओले गनर सोल्सजर नियुक्त भएसँगै युनाइटेडको यो लगातार छैटौ जित हो । युनाइटेडले यसअघि कार्डिफ सिटी, हडर्सफिल्ड, बर्नमाउथ, न्यु क्यासल र रेडिङलाई पराजित गरेको थियो ।

जितसँगै युनाइटेडले २२ खेलबाट ४१ अंक जोडेर पाँचौ स्थानमा रहेको आर्सनलसँगको अंक बराबरी गरेको छ । युनाइटेडसँग पराजित भएको टोटेनहम ४८ अंकसहति तेस्रो स्थानमा यथावत छ ।
प्रिमियर लिगकै अर्काे खेलमा एभर्टनले बर्नमाउथमाथि २–० को सहज जित निकालेको छ । एभर्टनको जितमा कर्ट जुमा र डोमिनिक कलभर्ट लेविनले गोल गरे । जितपछि एभर्टन २२ खेलबाट ३० अंक जोडेर १०औं स्थानमा उक्लिएको छ । २७ अंक रहेको बर्नमाउथ १२औं स्थानमा छ ।