एजेन्सी – चारपटकको एसियन कप च्याम्पियन जापान युनाइटेड अरब इमिरेट्स (युएईं) मा जारी एसियन कप फुटबलको प्रि–क्वाटरफाइनलमा प्रवेश गर्न सफल भएको छ ।

आबुधावीस्थित जायद स्पोर्टस् सिटी स्टेडियममा आइतबार भएको खेलमा जापानले ओमानलाई १–० ले पराजित गर्दै एक खेल अगावै समूह ‘एफ’ बाट अन्तिम १६ मा पुग्न सफल भएको हो । जापानले यसअघि पहिलो खेलमा तुर्केमिनिस्तानमाथि ३–२ को प्रतिस्पर्धात्मक जित निकालेको थियो । अब जापानले उज्वेकिस्तानसँग खेल्न बाँकी छ ।

प्रतिस्पर्धात्मक बनेको खेलमा जापान विवादास्पद पेनाल्टी गोलबाट विजयी भएको हो । जेन्की हारागुचीले पेनाल्टीमार्फत विवादास्पद गोल गरेका थिए । २५औं मिनेटमा ओमाका राइद सलेले जेन्कीमाथि फल गरेको भन्दै रेफ्रीले जापानलाई पेनाल्टीको मौका दिएको थियो ।

पेनाल्टी नरहेको भन्दै ओमानका खेलाडीले अपिल गरेपनि अन्ततः रेफ्रीले जापानलाई पेनाल्टी दियो । जसलाई २८औं मिनेटमा जिन्की आफैले गोल गर्दै जापानलाई अग्रता दिलाए ।

त्यसअघि जापानका नागाटोमोले पेनाल्टी बक्समा ह्यान्ड गरेपनि रेफ्रीले ओमानलाई पेनाल्टीको मौका दिएको थिएन ।
त्यसपछि पनि जापानले ओमानलाई दवावमा राखेपनि थप गोल निस्कन नसक्दा जिन्कीको गोल नै जापानको जितमा पर्याप्त बन्यो ।