धनगढी (हाम्रो खेलकुद) – लिग विजेता सिग्नेचर मनाङ मर्स्याङदी क्लब र नेपाल पुलिस क्लब तेस्रो नेपाल आईस सुदूरपश्चिम खप्तड गोल्डकपको दोस्रो क्वाटरफाइनलमा खेल्दै छन् ।

आइतबार धनगढी रंगशालामा दिनको २:३० बजे सुरु हुने खेलमा दुवै टोली अन्तिम चारमा स्थान सुरक्षित गर्ने लक्ष्यसहित अगाडी बढ्नेछन् । पुलिसले पहिलो खेलमा मोरङ फुटबल क्लबलाई पराजित गर्दा युवा फरवार्ड तिर्थ रानाले ह्याट्रिक गरेका थिए । उक्त खेलमा पुलिसका लागि मिडफिल्डर अभिषेक रिजालको प्रदर्शन पनि उच्च रहेको थियो । पुलिससँग आक्रमणमा यी दुई खेलाडीसँगै रवी पासवानको साथ रहनेछ ।

यता लिग जितेपछि उच्च मनोबलमा रहेको मनाङसँग भने केहि खेलाडी उपस्थित रहने छैनन् । नियमित कप्तान विराज महार्जन, उपकप्तान सुजल श्रेष्ठ र विदेशी फरवार्ड आडेलाज सोमिडे चोटका कारण पहिलो खेलमा हुने छैनन् । मिडफिल्डर पुजन उपरकोटीले क्लब छाडेका छन् भने अर्का मिडफिल्डर डोना थापा पनि घाइते छन् । मनाङले लिगदौरान खेलेका विदेशी खेलाडी भिक्टर कामुखाको स्थानमा अर्का विदेशी भिक्टर अमोबीलाई क्लबमा भित्र्याएको छ । अमोबीले यसअघि लिग सरस्वतीबाट खेलेका थिए । यसबाहेक क्लबले एनआरटीका सुशील लामालाई पनि टोलीमा सामेल गरेको छ ।

यस खेलमा विजयी हुने टोलीले अन्तिम चारमा स्थान सुरक्षित गर्नेछ । फाइनल प्रवेशका निम्ति यस खेलमा विजयी हुने टोलीले सीएमजी संकटा र क्यामरुनको धाउफिनस एफसीको विजेतासँग खेल्नेछ ।