एजेन्सी – पेरिस सेन्ट जर्मेन (पीएसजी) ले फ्रेन्च लिग वान फुटबलमा आफ्नो अपराजित यात्रालाई निरन्तरता दिएको छ । लिग वान अन्तर्गत शनिबार राति भएको खेलमा १० खेलाडीमा समेटिएको एमिनसलाई ३–० ले पराजित गर्दै आफ्नो अपराजित यात्रालाई निरन्तरता दियो ।

एमिन्सको मैदानमा प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । तर, ५७औं मिनेटमा एडिन्सन काभानीले पेनाल्टीमार्फत गोल गर्दै पीएसजीलाई अग्रता दिलाएका थिए । एलेक्स बीलिनले काभनीलाई बक्समा लडाएपछि भिएआरको सहायतामा पीएसजीले पेनाल्टीको मौका पाएको थियो । जसमा काभनीले कुनै गल्ती गरेनन् ।

६६औं मिनेटमा घरेलु टोली १० खेलाडीमा समेटियो । एमिन्सका खालिद एडिनन दोहोरो पहेलो कार्ड खादै मैदानबाट बाहिरिएको थियो । त्यसको प्रत्यक्ष फाइदा पीएसजीले उठायो । ७०औं मिनेटमा केलियन एमबाप्पेले गोल गर्दै पीएसजीको अग्रता दोब्बर पारे । उनले काभानीको पासलाई गोलमा परिणत गरेका थिए ।

७९औं मिनेटमा जुलियन ड्राक्सलरको पासमा मार्किन्योसले गोल गर्दै पीएसजीलाई ३–० को सहज जित दिलाए । जितपछि लिग वानमा अपराजित रहेको पीएसजीले १८ खेलबाट ५० अंक जोड्दै लिगको आफ्नो शीर्षता थप बलियो बनाएको छ । पीएसजीले दोस्रो स्थानमा रहेको लिलेमाथि १३ अंकको अग्रता बनाएको छ । पीएसजीले दुई खेल कम खेलेको छ ।