एजेन्सी – एसियन पावर हाउस अष्ट्रेलियाले एसियन कप फुटबलमा पहिलो जित निकालेको छ । पहिलो खेलमा जोर्डनसँग १–० ले स्तब्ध भएको अष्ट्रेलियाले दोस्रो खेलमा प्यालेस्टाइनलाई ३–० ले पराजित गर्दै पहिलो जित निकालेको हो ।

युनाइटेड अरब इमिरेट्स (युएईं) मा जारी प्रतियोगितामा अष्ट्रेलियालाई पहिलो जित दिलाउन जेमी माकलरेन, एवेर मविल र एपोस्टोलोस जियानोउले गोल गरे ।

दुवईस्थित माक्टोम विन रसिद अल माक्टोम रंगशालामा शुक्रबार भएको खेलमा अष्ट्रेलियाले खेलको १८औं मिनेटमा जेमी माकलरेनको गोलबाट अग्रता बनाएको थियो । उनले टोन रोजिकको पासलाई सदुपयोग गरेका थिए । २०औं मिनेटमा क्रिस्टोफोरको पासमा एवेर मविलले गोल गर्दै अष्ट्रेलियाको अग्रता दोब्बर पारे । इन्ज्युरी समयमा एपोस्टोलोस जियानोउले गोल गर्दै अष्ट्रेलियालाई ३–० को जित दिलाए ।
जितपछि अष्ट्रेलियाले समूह ‘बी’ मा ३ अंक जोड्दै दोस्रो स्थानमा उक्लिएको छ । अपराजित रहेको जोर्डन ६ अंक जोडेर लिगको शीर्षस्थानमा रहेको छ । सिरिया र प्यालेस्टाइन १–१ अंक जोडेर तेस्रो र चौथो स्थानमा छ ।

शुक्रबारै भएको एसियन कपको अर्काे खेलमा चीनले फिलिपिन्समाथि ३–० को सहज जित निकालेको छ । चीनको सहज जितमा लिइ वुले २ तथा दावाओ युले एक गोल गरे ।
जितसँगै चीनले समूह ‘सी’ मा अपराजित रहँदै शीर्ष स्थानमा रहेको छ । लगातार दोस्रो हार बेहोरेको फिलिपिन्स अंक विहीन हुदै पुछारमा छ ।