धनगढी (हाम्रो खेलकुद) – गोर्खा ब्वाइज रुपन्देहीलाई २-० ले पराजित गर्दै सीएमजी क्लब संकटा तेस्रो नेपाल आईस अन्तर्राष्ट्रिय सुदूरपश्चिम खप्तड गोल्डकपको क्वाटरफाइनलमा प्रवेश गरको छ । शुक्रबार दुवै हाफमा १-१ गोल गरेको संकटाले अब क्यामरुनको धाउफिन्स एफसीसँग अन्तिम चार प्रवेशको निम्ति खेल्नेछ ।

धनगढी रंगशालामा भएको प्रतिस्पर्धात्मक खेलमा संकटाका लागि सातौं मिनेटमा लक्ष्मण रुचालको फ्रिकिकमा सरोज दाहालको फ्लिक पोस्टभन्दा थोरै माथिबाट बाहिरियो । लगत्तै सुभाष गुरुङले पेनाल्टी क्षेत्रभित्रबाट गरेको प्रहार पोस्टभन्दा थोरै बाहिर जाँदा संकटा अग्रता लिनबाट चुक्यो ।

१८ अौं मिनेटमा गोर्खा ब्वाइजका शिव श्रेष्ठले झन्डै २५ यार्ड टाढाबाट गरेको प्रहारलाई संकटाका गोलरक्षक राजाबाबु थापाले पन्च गरिदिए । ३८ अौं मिनेटमा गौतम श्रेष्ठको क्रसमा कजिमको शक्तिशाली प्रहारलाई राजाबाबुले उत्कृष्ट डाइभ दिँदै बचाए ।

एकतर्फी आक्रमण बुनेको संकटाले अन्तत: इन्जुरी समयको पहिलो मिनेटमा संकटाले अग्रता लियो । जय गुरुङको पासमा रवि सिलवालले पेनाल्टी क्षेत्रभित्र बललाई नियन्त्रणमा लिँदै प्रहार गरेको सटलाई गोलरक्षक सोजित गुरुङले रोक्न सकेनन् ।

दोस्रो हाफको ६६ अौं मिनेटमा संकटाका लक्ष्मण रुचालको पासमा गोलरक्षक बिट भएपछि एलोन म्याक्सवेलको प्रहारलाई कुलदीप कार्कीले गोललाइनबाट बचाए । ८१ अौं मिनेटमा गोर्खा ब्वाइजका कजिमको क्रसमा गौतम श्रेष्ठको प्रहार पोस्टभन्दा थोरै माथिबाट बाहिरिँदा संकटाको अग्रता कायमै रहेको थियो ।

८३ अौं मिनेटमा फोफाना इब्राहिमको लो क्रसमा एलोन म्याक्सवेलले गोल गर्दै संकटाको जित पक्का गरे । इन्ज्युरी समयको दोस्रो मिनेटमा कुलदिपको पासमा मसुदले वन भर्सेस वनको स्थितिमा प्रहार गरेको सट पोस्टभन्दा माथि गएपछि गोर्खा ब्वाइजले सान्त्वना गोल फर्काउन सकेन ।

विजयी टोलीका प्रशिक्षक सल्यान खड्गीले जित दर्ता गरेपनि मैदानको अवस्थाका कारण प्रदर्शन सोचेअनुरुप हुन नसकेको बताए । ‘सहज जित दर्ता गर्दा खुसी छु । तर हामीले मैदानको अवस्थाका कारण सोचेजस्तो खेल्न सकेनौं । ठूलो राशी पुरस्कार भएपनि मैदानको अवस्था भने केहि कमजोर रहेको पाएँ,’ उनले भने ।

गोर्खा ब्वाइजका प्रशिक्षक दयाराम श्रेष्ठले पाएको अवसर सदुपयोग गर्न नसक्दा हार बेहोरेको बताए । ‘हामीले निकै अवसर पाएपनि त्यसको सदुपयोग गर्न सकेनौं । खेलाडीले पहिलो हाफको तुलनामा दोस्रो हाफ निकै राम्रो प्रदर्शन गरे । तर दोस्रो हाफमा पाएको अवसर उपयोग गर्न नसक्दा नतिजा हाम्रो पक्षमा आएन,’ उनले थपे ।

मोफसलकै सर्वाधिक धनराशी पुरस्कार रहेको प्रतियोगिताको विजेताले २१ लाख रुपैयाँ र उपविजेताले १० लाख रुपैयाँ प्राप्त गर्नेछ । शनिबारदेखि प्रतियोगिताको क्वाटरफाइनल चरणका खेलहरु सुरु हुनेछ । पहिलो क्वाटरफाइनलमा नेपाल एपीएफ क्लब र मेची नेत्रालय काक्करभीट्टा ट्रेनिङ सेन्टर खेल्नेछन् ।