धनगढी (हाम्रो खेलकुद) – भ्याली च्यासल युवा क्लबले राजधानीमा भर्खरै सम्पन्न लिगमा फरवार्डको कमीमा कारण निकै समस्या झेल्नुपर्यो । लगातार फरवार्डहरुको साथ नपाउँदा शीर्षस्थानको लक्ष्य बोकेको च्यासल लिगको आठौं स्थानमा चित्त बुझाउनुपर्यो ।

बिहीबार धनगढीमा लिगको समापनपश्चात मोफसलको पहिलो प्रतियोगिता खेलिरहेको च्यासलले दिल्ली फुटबल क्लबलाई ६-० को फराकिलो अन्तरले पराजित गर्यो । उक्त खेलमा डेब्यु गरेका फरवार्ड अर्मान्डले ह्याट्रिक नै गरे । खप्तड गोल्डकपको पहिलो खेलमा फराकिलो जितसँगै च्यासलले क्वाटरफाइनलमा थ्री स्टारसँग खेल्ने भएको छ । च्यासलका प्रशिक्षक राजुकाजी शाक्य अर्मान्डको आगमनसँगै च्यासलले मोफसलमा राम्रो प्रदर्शन गर्ने बताउँछन् ।

‘ लिगका दौरान हामीले फरवार्ड नहुँदा निकै समस्या खेप्नुपर्यो । गोल गर्न नसकेकै कारण हामीले धेरै खेल गुमायौं । डिफेन्स र मिडफिल्ड राम्रो छ । अब मोफसलमा नयाँ खेलाडी अर्मान्डले राम्रो सुरुवात गरेका छन् । यसैलाई निरन्तरता दिएर केहि सफलता हात पार्ने सोच छ,’ शाक्यले भने ।

च्यासलका व्यवस्थापक शंकर व्यन्जनकार र प्रशिक्षक राजुकाजी शाक्य

च्यासलले लिगमा आफूसँग उपलब्ध तीन शीर्ष फरवार्डको साथ् गुमाएको हो । लिगको सुरुवाती ४ खेलपछि विमल घर्तिमगर बेल्जियम जानुपर्दा च्यासलले सन्तोष साहुखललाई पनि अन्तिमतिर गुमाएको थियो । त्यसबिचमा च्यासलले अनुबन्धन गरेका विदेशी फरवार्ड चीको पनि घाइते हुँदै एक खेल पनि खेल्न सकेनन् । लिगको अन्त्यतिर आएका फरवार्ड एल्भिसले पनि फिटनेस नभएका कारण सोचेअनुरुप प्रदर्शन गर्न सकेनन् ।

खप्तड गोल्डकपमा दिल्लीविरुद्ध खेलमा भने एल्भिस र अर्मान्डको जोडी जमेको थियो । दुवैले एक अर्काको खेल बुझेर खेले । एल्भिसले गोल नगरेपनि च्यासलको सुरुवाती गोलमा असिस्ट दिएका थिए । त्यसबाहेक अर्मान्डसँग उनको समन्वय राम्रो देखिएको थियो । च्यासलका नियमित कप्तान देवेन्द्र तामाङ पहिलो खेलमा उपस्थित नभएपनि दोस्रो खेलमा भने उपस्थित हुने व्यवस्थापनले जानकारी दिएको छ ।

एल्भिस र अर्मान्ड