धनगढी (हाम्रो खेलकुद) – युवा फरवार्ड तिर्थ रानाले ह्याट्रिक गरेपछि  नेपाल पुलिस क्लबले तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपअन्तर्गत बुधबारको खेलमा मोरङ फुटबल क्लबलाई ३-० ले पराजित गरेको छ । पहिलो हाफमा २ गोल गरेका तिर्थले दोस्रो हाफको अन्तिम समयमा गोल गर्दै ह्याट्रिक पूरा गरेका थिए । यससँगै पुलिस क्वाटरफाइनलमा प्रवेश गरेको छ ।

धनगढी रंगशालामा खेलको सातौं मिनेटमा पुलिसले तीर्थ रानाको गोलमा अग्रता लियो । उनले पेनाल्टी क्षेत्रभित्रबाट गरेको प्रहारलाई मोरङका गोलरक्षक सन्तोष योन्जनले बचाउन सकेनन् । २५ अौं मिनेटमा मोरङका बालाको फ्रिकिकमा गोलरक्षकले पन्च गरेको रिबाउन्डमा विदुर रिजालको प्रहारले पोस्टको दिशा लिन सकेन ।

३५ अौं मिनेटमा अभिषेक रिजालको उत्कृष्ट मुभमा तीर्थले पुलिसको अग्रता दोब्बर पारे । अभिषेकले विङ्गबाट एक्लै बढाएको बललाई पेनाल्टी क्षेत्रभित्र लग्दै किपरलाई बिट गरेर दिएको पासमा तीर्थले हेडर गोल गरे । ४३ अौं मिनेटमा तेज तामाङले पेनाल्टी क्षेत्र बाहिरबाट गरेको प्रहार पोस्टभन्दा थोरै माथिबाट बाहिरियो ।

दोस्रो हाफमा पनि पुलिसले अाक्रमक रणनीतिलाई कायम राख्दै पोस्टमा अाक्रमण गरिरह्यो । ५७ अौं मिनेटमा सन्तोष हेमरुनको क्रसमा निरकुमार राईको भली प्रहारले पोस्टको दिशा लिन सकेन । लगत्तै निरकुमारले नै छोटो कर्नरमा सिधै पोस्टमा गरेको प्रहार क्रसबारमा लागेर फर्कियो ‌।

७५ अौं मिनेटमा अभिषेकको पासमा सन्तोष हेमरुनको प्रहार फितलो रहँदा पुलिसले अग्रता बढाउन सकेन । दोस्रो हाफको इन्जुरी समयमा अभिषेक रिजालको पासमा तिर्थले गोल गर्दै ह्याट्रिक पूरा गरे । उनी खेलको म्यान अफ द म्याच घोषित हुँदै १० हजार रुपैयाँ प्राप्त गरे ।

पराजित टोलीका प्रशिक्षक संजिव बुढाथोकीले बलियो पुलिसविरुद्ध आफ्ना युवा खेलाडीले डटेर खेल्न नसकेको बताए । ‘ हामीले पुलिसलाई पराजित गर्न सहज थिएन । त्यसैले टाइब्रेकरसम्म लाग्ने रणनिति थियो । तर त्यसमा हाम्रा खेलाडीहरु सफ्गल भएनन्,’ उनले भने ।

पुलिसका प्रशिक्षक अनन्त थापाले मैदान केहि नयाँ भएकोले सेट हुन समय लागेपनि नतिजा हात पार्दा खुसी रहेको बताए । ‘हाम्रो टोली युवा जोशले भरिएको छ । कमजोर विपक्षी भएपनि मैदान नयाँ भएकाले केहि कठिनाई भयो । अब अर्को खेलमा प्रदर्शन अझै राम्रो हुने विश्वास छ,’ उनले भने ।

पुलिसले अब पुष २९ गते हुने क्वाटरफाइनलमा मनाङ मर्स्याङ्दीको सामना गर्नेछ । बिहिबार हुने खेलमा भ्याली च्यासल युवा क्लबले दिल्ली युनाइटेडसँग खेल्नेछ ।