पोखरा ०१ बैशाख

झापा पोखरा रंगशालामा जारी मनकामना केबुलकार पोखरा कप अन्र्तराष्ट्रिय फुटवल प्रतियोगिता २०७२ को क्वाटरफाईनलमा प्रवेश गरेको छ । बुधबार पोखरा रङ्गशालामा सम्पन्न खेलमा रुपन्देही११ लाई ३–१ को अन्तरले पराजित गर्दै झापा ११ क्वाटरफाइनलमा प्रवेश गरेको हो।

झापाको जितमा कर्ण लिम्बु, देवेन्द्र तामाङ र दिलेन लोक्तानले एक–एक गोल गरेका थिए । खेलमा झापाका कर्ण लिम्बुले खेलको ३२ औं मिनेटमा गोल गर्दै झापालाई अग्रता दिलाएका थिए ।

पहिलो हाफ र दोश्रो हाफको अन्तिम ५ मिनेटसम्म १/१ को बराबरीमा रोक्न सफल रुपन्देही खेलको अन्त्य तिर धर्मराउदा झापाले बाजी मार्न सफल भएको हो । झापाका देवेन्द्र तामाङले खेलको ८५ औं र ईन्जुरी समयमा दिलेन लोक्तानले हेडर गोल गर्दै जित दिलाएका थिए । खेलमा रुपन्देहीको दोन थापाले सान्तवना गोल गरेका थिए ।

बुधबारको खेलमा देवेन्द्र तामाङ म्यान अफ दी म्याच भए । प्रतियोगिता अन्तर्गत विहीबार आयोजक पोखरा ११ र धरान फुटवल क्लव बिच खेल हुनेछ । प्रतियोगिताको बिजेतालाई ट्रफी सहित ५ लाख ५ हजार ५ सय ५५ रुपैयाा र उपबिजेतालाई ट्रफी सहित २ लाख ५५ हजार ५ सय ५५ रुपैयाा प्रदान गरिने आयोजक कास्की जिल्ला फुटवल संघले जनाएको छ ।

प्रतियोगितामा उत्कृष्ट हुने खेलाडीलाई एक थान मोटरसाईकल प्रदान गरीने छ । त्यस्तै प्रतियोगिताका सर्वोत्कृष्ट खेलाडी, उत्कृष्ट स्ट्राईकर, उत्कृष्ट फरवार्ड, उत्कृष्ट डिफेन्डर, उत्कृष्ट गोलरक्षक र उत्कृष्ट प्रशिक्षकलाई जनही १५/१५ हजारका दरले नगद सहित ट्रफी प्रदान गरिनेछ ।