एजेन्सी – स्पेनिस क्लब रियल म्याड्रिडका जर्मन मिडफिल्डर टोनी क्रुस तिघ्राको चोटका कारण झन्डै एक महिना मैदानबाहिर रहने भएका छन् । यसअघि विंगरद्वय ग्यारेथ बेल र मार्को एसेन्सियोलाई गुमाएको रियललाई थप धक्का पुगेको छ ।

आइतबार लिग अन्तर्गत रियल सोसीडाडविरुद्ध २-० को हार बेहोर्दा क्रुस अन्तिम १० मिनेट बाँकी हुँदा मैदान छाड्न बाध्य भएका थिए । उक्त नतिजासँगै रियल अंक तालिकाको पाँचौ स्थानमा पुगेको छ । बार्सिलोनाले रियलसँग १० अंकको अग्रता कायम गरिसकेको छ । क्रुसको चोटले रियलको मिडफिल्डमा थप समस्या पर्ने भएको छ ।

रियल म्याड्रिडले क्रुसको विषयमा विज्ञप्ति नै जारी गरेको छ । ‘क्रुसको तिघ्रामा लागेको चोटको विस्तृत स्वास्थ्य परिक्षणले उनको मांसपेशीमा समस्या दोस्रो श्रेणीको च्यातिएको देखिएको छ । उनको स्वास्थ्य अवस्थामा नियमित निरिक्षण क्लबले गर्नेछ ।’

दोस्रो श्रेणीको मांशपेसी च्यातिनु भनेको ३ देखि ६ सातासम्म विश्राममा बस्नुपर्ने हुन्छ । तेस्रो श्रेणी च्यातिंदा भने ठिक हुन ३ महिनासम्म लाग्छ । क्रुसले अब कोपा डेल रे अन्तर्गत लेगानेसविरुद्ध दुवै खेल गुमाउने छन् । उनले लिगमा पनि रियल बेटिस र सेभिल्लाविरुद्ध खेल्ने छैनन् । उनले फेब्रुअरीमा हुने च्याम्पियन्स लिगको लागि भने टोलीमा फर्कने आशा देखेका छन् ।