काठमाडौं (हाम्रो खेलकुद) – विभागीय नेपाल पुलिस क्लबले सरस्वती युथ क्लबसँग बराबरी खेल्दै पल्सर सहिद स्मारक ‘ए’ डिभिजन लिग फुटबलको अन्त्य गरेको छ । त्यस्तै भ्याली च्यासल युवा क्लब र जावलाखेल युवा क्लबको खेल पनि बराबरीमा सकियो ।

पुलिसले एक गोलले पछि परेको अवस्था उल्ट्याएर १–१ गोलको बराबरीको नतिजा निकालेको हो । हल्चोकस्थित एपिएफको मैदानमा शनिबार भएको खेलको पहिलो हाफ गोलरहित बराबरीमा सकिएको थियो । पहिलो हाफको तेस्रो मिनेटमा नै सरस्वतीले खेलमा अग्रता बनाउने मौका खेर फालेको थियो । मनिष थापाको पासमा फ्रान्सिसले बललाई राम्ररी नियन्त्रणमा लिन नसक्दा पुलिसका गोलरक्षक अर्पण कार्कीले अघि बढेर बचाएका थिए ।

२०औं मिनेटमा रमेश तामाङको करव ३० यार्ड टाढाको शक्तिशाली फ्रिकिक क्रसबारमा लागेर फर्किएको थियो । ३८औं मिनेटमा निर कुमार राईको पासलाई रवि पासवानको प्रहार दोस्रो बारबाट थोरै बाहिरियो । ४१औं मिनेटमा सरस्वतीका फ्रान्सिसको प्रहार पुलिसका गोलरक्षकले मुस्किलले बचाएका थिए । पहिलो हाफको इन्ज्युरी समयमा रवि पासवानले मैदानको मध्यभागबाटै बल अघि बढाएपनि गोलरक्षकलाई छक्याउदै गरेको प्रहार दोस्रो बारबाट थोरै बाहिरिएको थियो ।

दोस्रो हाफको ५०औं मिनेटमा सरस्वतीले पेनाल्टीमार्फत गोल गर्दै पुलिसविरुद्ध अग्रता बनाएको थियो । पुलिसका हेम तामाङले तीर्थ बस्नेतलाई बक्समा लडाएपछि रेफ्री सुदिश पान्डेले सरस्वतीलाई पेनाल्टीको मौका दिएको थियो । जसलाई भिक्टर अमोमीले सहजै गोल गरे । तर, त्यसको तीन मिनेट पछि नै पुलिसले बराबरी गोल फर्कायो ।

निर कुमार राईको पासमा रवि पासवानले सिक्स यार्ड बक्सबाट वान टचमै गोल गर्दै खेललाई बराबरीमा ल्याएका थिए । त्यसपछि पुलिसले सरस्वती माथि लगातार आक्रमण बुनेपनि फिनिसिङ गर्न सकेन । ७२औं मिनेटमा रवि पासवानले खाली पोस्टमा गोल गर्न सकेन । ८१औं मिनेटमा अभिषेक रिजालको क्रसमा हरि कठायतको हेडर गोलरक्षक प्रदीप भट्टराईले सहजै बचाए । इन्ज्युरी समयको थप गरिएको तेस्रो मिनेटमा निर कुमार राईको क्रसमा अनमार्क रहेका अभिषेक रिजालको हेडर पोस्टबाट थोरै बाहिरिदा पुलिस जितबाट वञ्चित बन्यो । यता, सरस्वतीको केही आक्रमणलाई पुलिसका गोलरक्षक अर्पण कार्कीले विफल पारिदिएका थिए ।

बराबरीपछि पुलिसले लिगमा १३ खेलबाट १९ अंक जोड्दै छैटौ स्थानमा रहेको छ । थ्रीस्टार र हिमालयन शेर्पा बीचको खेलमा शेर्पाले जत निकाले पुलिसले सातौ स्थानमा झर्नेछ । बराबरीमा रोकिएको अवस्थामा भने पुलिसले छैटौ स्थानमा लिगको अन्त्य गर्नेछ । १४ अंक जोडेरको सरस्वतीले नवौं स्थानमा रहेर लिग अन्त्य गर्यो ।

बराबरीपछि सरस्वतीका प्रशिक्षक प्रदीप नेपालले शीर्ष ६ भित्र पर्ने योजना बनाएपनि दुई खेल बिग्रदा नवौ स्थानमा रहनुपरेको बताए । उनले यो पोजिसनमा सन्तुष्ट रहेको थपे । यता, पुलिसका प्रशिक्षक अनन्तराज थापाले फिनिसिङमा समस्या हुदा लिगमा लक्ष्यमा पुग्न नसकिएको बताए ।

त्यसअघि दिनको पहिलो खेलमा च्यासल र जावलाखेलको खेल १-१ को बराबरीमा टुंगिएको थियो । खेलको दशौं मिनेटमा जावलाखेलले अरुज सिंहको गोलमा सुरुवाती अग्रता लिएको थियो । च्यासलका लागि छिरिङ गुरुङले ३२ औं मिनेटमा बराबरी गोल फर्काए ।

यस बराबरीले च्यासल १३ खेलमा १६ अंक जोड्दै आठौं स्थानमा रहने भएको छ । जावलाखेलले भने १३ खेलमा १३ अंक जोड्दै दशौं स्थानमा रहेर लिग अन्त्य गरेको छ ।