एजेन्सी – रियल म्याड्रिड मिडफिल्डर इस्को जनवरी ट्रान्सफर विन्डोमा इंग्लिस क्लब चेल्सी पुग्ने सम्भावना न्यून भएको छ । स्पेनिस मिडफिल्डरले राखेको तलबको प्रस्ताव चेल्सील नकारेसँगै उनको प्रिमियर लिग खेल्ने सम्भावना कम भएको हो ।

चेल्सीले लामो समयदेखि इस्कोलाई आफ्नो लक्ष्य बनाउँदै आएको थियो । रियालमा नयाँ प्रशिक्षक सान्टियागो सोलारीको आगमनसँगै इस्को पहिलो रोजाइमा पर्न सकेका छैनन् । यसका कारण इस्कोले क्लब छाड्ने सम्भावना झनै मजबुत बनेको थियो । चेल्सीले इस्कोलाई क्लबमा ल्याउन क्लबसँग सहमति गरेपनि खेलाडीको माग भने एक्कासी बढेपछि क्लब पछाडी हटेको हो ।

चेल्सीले इस्कोलाई २ लाख ५० हजार पाउण्ड प्रति सातासँगै एजेन्ट फी र अनुबन्ध गर्दाको बोनस दिन राजी भएको थियो । तर इस्कोले अन्तिम समयमा माग बढाएपछि चेल्सीले इस्को क्लबमा खेल्न भन्दा पनि पैसा कमाउन आउने निर्क्यौल गर्दै उनलाई अनुबन्धन नगर्ने निर्णयमा पुगेको हो । स्पेनका लागि ३४ खेल खेलिसकेका इस्कोले यस सिजन रियल म्याड्रिडका लागि जम्मा ११ खेल खेल्न पाएका छन् ।

इस्कोसँग सम्झौता हुने नसक्ने भएसँगै चेल्सीले आफ्नो ध्यान अर्का मिडफिल्डर तर्फ मोडेको छ । चेल्सीले जर्मन क्लब बोरुसिया डर्टमुन्डका अमेरिकी मिडफिल्डर क्रिस्टियन पुलिसिचलाई क्लबमा ल्याउने प्रस्ताव गरेको छ । यद्यपी पुलिसिचको आगमन जनवरी विन्डोभन्दा सिजन सकिएपछि मात्र हुने बलियो सम्भावना रहेको छ ।