काठमाडौं (हाम्रो खेलकुद) – सिग्नेचर मनाङ मस्र्याङ्दी क्लब अन्तिम चरणका २ खेल बाँकी रहँदै पल्सर सहिद स्मारक ए डिभिजन लिगको च्याम्पियन बनेको छ । ११ चरण सम्म आइपुग्दा विजय यात्रालाई जारी राखेको मनाङले उपाधि रक्षा पनि गरेको हो ।

मनाङको यो आठौं लिग उपाधि हो । पछिल्लो पटक २०७० मा आयोजना भएको ए डिभिजन लिग पनि मनाङले नै जितेको थियो । सातदोबाटेस्थित एन्फा कम्प्लेक्समा निकटतम प्रतिद्धन्द्धी सिएमजी क्लब संकटालाई बिहीबार ३–१ ले हराउँदै मनाङले अन्तिम २ खेल बाँकी रहँदा लिग उपाधि पक्का गरेको हो । मनाङका तीनै गोलमा विशाल राईको भूमिका रह्यो ।

रेलिगसेन विनाको लिगमा ११ खेलको समाप्तीमा शीर्ष स्थानको मनाङको ३३ अंक छ । २५ अंकको संकटाले अन्तिम २ खेल जितेपनि अब मनाङलाई भेट्ने छैन । पहिलो हाफको इन्जुरी समयमा मनाङका विशाल राईले प्रहार गरेको कर्नर संकटाका गोलकिपर राजाबाबु थापाले पन्च गर्न खोज्दा आफ्नै पोस्टमा बसेका रोशन पहारीलाई लाग्दै छिरेपछि मनाङले अग्रता लिएको थियो ।

खेल सकिन ८ मिनेट बाँकी रहँदा पुजन उपरकोटीले मनाङको अग्रता दोब्बर पारे । सुजल श्रेष्ठको सट्टा मैदान प्रवेश गरेको पहिलो टचमै उनले गोल गरेका थिए । विशालको कर्नरमा उनले हेडरमा गोल गरेका थिए ।

८७ औं मिनेटमा विशालकै क्रसमा एडिलाजाको हेडमा गोलमा मनाङले अग्रतालाई ३–० बनाएको थियो । ८९ औं मिनेटमा संकटाका लागि सेड्रिक आबाले पेनाल्टी बक्स भित्रबाट गोल गर्दै अन्तर घटाएका थिए । लिग उपाधिसँगै मनाङले ५० लाख रुपैयाँ पक्का गरेको छ ।

घरेलु लिगमा आठ पटक लिग जित्ने मनाङ एक्लो टोली हो । अहिले बी डिभिजनमा रहेको आरसिटीले ६ पटक तथा रुस्लान थ्री स्टार क्लब र न्यूरोड टिम एनआरटीले समान ४ पटक लिग उपाधि जितेका छन् । मनाङले यसअघि २०४३, २०४४, २०४६, २०५७, २०६०, २०६२ र २०७० मा ए डिभिजन लिग जितेको थियो ।

मनाङका लागि फरवार्ड ओलावाले आफिजले ६ तथा अन्जन विष्टले ५ गोल गरेका छन् । मनाङले ११ खेलमा ५ क्लिनसिट पनि राखेको छ ।