वाटफोर्ड (एजेन्सी) – बेल्जियन फरवार्ड इडेन हजार्डको दुई गोल मद्दतमा लन्डन क्लब चेल्सीले इंग्लिस प्रिमियर लिग फुटबलमा वाटफोर्डलाई २–१ ले पराजित गरेको छ ।

घरेलु मैदानमा वाटफोर्डका रोबर्टाे पेरेराले एक गोल फर्काए । पहिलो हाफको इन्ज्युरी समयको थप गरिएको पहिलो मिनेटमा हजार्डले गोल गर्दै चेल्सीलाई सुरुवाती अग्रता दिलाएका थिए । उनले माटियो कोभासिकले उपलब्ध गराएको पासलाई सदुपयोग गरेका थिए ।

इन्ज्युरी समयको थप गरिएको तेस्रो मिनेटमा रोबर्टाे पेरेराले गोल गरेपछि पहिलो हाफमा १–१ गोलको बराबरीमा पुगेको थियो । जोसे होलेवासको कर्नरमा आएको बललाई रोबर्टाेले पोस्ट नजिकैबाट गरेको भली प्रहारमार्फत गोल गरेका थिए ।

५८औं मिनेटमा हजार्डले पेनाल्टीमार्फत गोल गर्दै चेल्सीलाई २–१ को अग्रता दिलाए । बल अघि बढाएको अवस्थामा वाटफोर्डका गोलरक्षक विन फोस्टरले हजार्ड माथि फल गरेपछि चेल्सीले पेनाल्टीको मौका पाएको थियो । जसलाई उनी आफैले सदुपयोग गरे ।

त्यसपछि थप गोल निस्कन नसक्दा चेल्सी २–१ ले विजयी हुन सफल भयो । जितपछि चेल्सी ४० अंक जोडेर लिगको चौथो स्थानमा यथावत छ । पराजित वाटफोर्ड २७ अंकसहित नवौं स्थानमा छ ।

लिग अन्तरगत नै बुधबार राति भएको खेलमा आर्सनल ब्राइटन होव अल्वियोनसँग १–१ गोलको बराबरीमा रोकियो । आर्सनलका पिएरे हेनरिक औवामियाङले खेलको सातौ मिनेटमा गोल गर्दै टोलीलाई सुरुवाती अग्रता दिलाएका थिए । ३५औं मिनेटमा घरेलु टोलीका जर्गेन लोकाडियाले बराबरी गोल फर्काए ।

बराबरीपछि आर्सनलले चौथो स्थानमा रहेको चेल्सीसँग अंक बराबरी गर्ने मौका गुमाएको छ । आर्सनलको ३८ अंक पुगेको छ । ब्राइटन २२ अंक जोडेर १३औं स्थानमा छ ।