एनफिल्ड (एजेन्सी) – इंग्लिस प्रिमियर लिग फुटबलमा शीर्षस्थानमा रहेको लिभरपुलले न्यु क्यास्टलमाथि शानदार जित निकाल्दा म्यानचेस्टर सिटी लेस्टरसिटीसँग स्तब्ध बनेको छ ।

प्रिमियर लिग अन्तरगत बुधबार राति भएको खेलमा लिभरपुले न्यु क्यास्टललाई ४–० को भारी अन्तरले पराजित गर्दा सिटी लेस्टरसँग २–१ ले स्तब्ध बनेको हो ।

यससँगै अपराजित रहेको लिभरपुलले आफ्नो शीर्षता ६ अंक पु¥याएको छ । लिभरपुलको ५१ अंक पुगेको छ । सिटीलाई ७ अंकले पछि पारेको छ । दोस्रो स्थानमा उक्लिएको टोटेनहमको ४५ अंक छ ।

घरेलु मैदान एनफिल्डमा लिभरपुललाई फराकिलो जित दिलाउन डिजन लभरेन, मोहम्मद सलाह, जरदान शाकिरी र फाविन्होले गोल गरे ।
लिभरपुलले खेलको ११औं मिनेटमा डिजनको गोलबाट पहिलो हाफमा १–० को अग्रता बनाएको थियो ।

४७औं मिनेटमा मोहम्मद सलाहले पेनाल्टीमार्फत गोल गरेपछि लिभरपुल २–० ले अघि बढ्यो । पल डम्मेटले सलाहलाई अनावश्यक फल गरेपछि लिभरपलुले पेनाल्टीको मौका पाएको थियो । जसमा सलाहले सहजै गोल गरे ।

७९औं मिनेटमा टे«न्ट एलेसन्दर अर्नाेल्डको पासमा जरदान शकिरीले गोल गर्दै लिभरपुललाई ३–० को स्थितिमा ल्यायो । खेल सकिन ५ मिनेट बाँकी रहँदा सलाहको पासमा फाविन्होले गोल गर्दै लिभरपुललाई फराकिलो जित दिलाए ।

बुधबार राति नै भएको अर्काे खेलमा साविकको विजेता म्यानचेस्टर सिटी लेस्टर सिटीसँग २–१ ले स्तब्ध बनेको छ । सिटीले खेलमा अग्रता लिएर पनि अग्रता जोगाउन नसक्दा लेस्टरसँग स्तब्ध बनेको हो । सिटीलाई स्तब्ध बनाउन मार्क अलब्रिटन र रिकार्डाे पेरिराले गोल गरे । सिटीका बर्नाडो सिल्भाले एक गोल गरे ।

लेस्टरको मैदान किङ पावर स्टेडियममा भएको खेलमा सिटीले खेलको १४औं मिनेटमा बर्नाडो सिल्भाको गोलबाट खेलमा अग्रता बनाएको थियो । सिल्भाले सर्जियो अग्विरोको पासलाई सदुपयोग गरेका थिए । तर, सिटीको त्यो अग्रता लामो समय टिकेन ।

१९औं मिनेटमा घरेलु टोलीका मार्क अलब्रिटनले बराबरी गोल फर्काए । उनले जेमी भार्डीको पासलाई गोलमा परिणत गरेका थिए । प्रतिस्पर्धात्मक बनेको खेलको ८१औं मिनेटमा रिकार्डाेले गोल गर्दै घरेलु टोलीलाई खेलमा २–१ को अग्रता दिलाए ।

त्यसपछि थप गोल निस्कन नसक्दा सिटी लेस्टरसँग २–१ ले स्तब्ध बन्न पुग्यो । सिटी अन्तिम समयमा १० खेलाडीमा रिसमेटिन पुग्यो । सिटीका फावियन डेफले रिकार्डाे पेरिरामाथि गम्भीर फल गरेपछि रेफ्रीले उनलाई सोझै रातो कार्ड देखाएर मैदान बाहिर पठाएका थिए ।

लेस्टरसँगको हारपछि सिटी तेस्रो स्थानमा झरेको छ । लेस्टर २८ अंक जोडेर सातौ स्थानमा उक्लिएको हो ।