एजेन्सी – स्टार फरवार्ड क्रिस्टियानो रोनाल्डोले वैकल्पिक खेलाडीको रुपमा मैदान छिर्दै गोल गरेपछि इटालियन सिरी ए अन्तर्गत बुधबार १० खेलाडीमा सिमित युभेन्ट्स एटलान्टासँग २-२ को बराबरीमा रोकिएको छ ।

प्रशिक्षक मासिमिलानो एलेग्रीले रोनाल्डोलाई विश्राम दिँदै बेन्चमा राखेपनि युभेन्ट्सले खेलको दोस्रो मिनेटमा नै अग्रता लिएको थियो । एटलान्टाका बेराट जिम्सितीले आत्मघाती गोल गरेपछि युभे अगाडी बढेको थियो ।  खेलको २४ औं मिनेटमा पापु गोमेजको पासलाई सदुपयोग गर्दै दुभान जपाताले बराबरी गोल फर्काए ।

दोस्रो हाफको ५३ औं मिनेटमा युभेन्ट्स १० खेलाडीमा सिमित भयो । रोड्रीगो बेन्टान्कुरले दोस्रो पहेंलो कार्ड खाँदै मैदान बाहिरीपछि युभे समस्यामा परेको थियो । त्यसको ३ मिनेटमा नै युभे खेलमा पछाडी पर्यो । गोमेजकै क्रसमा जपताले गोल गर्दै घरेलु टोली एटलान्टालाई अगाडी बढाए ।

प्रशिक्षक एलेग्रीले रोनाल्डोलाई ६५ औं मिनेटमा सामी खेडिराको स्थानमा मैदान पठाए । रोनाल्डोले ७८ औं मिनेटमा मारियो मान्जुकीचको पासलाई सदुपयोग गर्दै बराबरी गोल गरे । यस बराबरीसँगै युभेन्ट्सले लिगमा अपराजित यात्रालाई कायम राखेको छ । टोलीले १८ खेलमा १६ जित र २ बराबरीसँगै ५० अंक जोडेको छ ।