एजेन्सी – ब्राजिलियन फरवार्ड नेयामारले निकट भविष्यमा बार्सिलोना फर्कने संकेत दिएका छन् । २६ वर्षीय फरवार्डले सन् २०१७ को ट्रान्सफर विन्डोमा २ सय २० मिलियन युरोमा बार्सिलोना छाडेर फ्रान्सेली क्लब पेरिस सेन्ट जर्मेन (पीएसजी) पुगेका थिए ।

नेयमारले बार्सिलोना छाड्ने बेलामा गरेको व्यवहारका कारण उनलाई समर्थकहरुले पछिल्लो समय रुचाएका छैनन् । तर यसका बाबजुद नेयमारको व्यवस्थापनमा काम गर्ने व्यक्तिहरुले निरन्तर रुपमा बार्सिलोनालाई सम्पर्क गरेर उनलाई क्लबमा फर्कने प्रबन्ध मिलाउन सल्लाह गरिरहेका छन् । नेयमार आफैं पनि बेलाबेलामा बार्सिलोना पुग्ने गरेको स्रोतले जनाएको छ ।

‘ नेयमार जब आफ्नो व्यक्तिगत कामले बार्सिलोना आउँछन् उनले क्लब र ड्रेसीङ रुममा पुगेर केहि समय बिताउने गर्छन् । उनले क्लब छाड्नु नै गलत निर्णय थियो,’ स्रोतले थप्यो, ‘उनीसँग यहाँ सबथोक थियो । उनले आफ्नो चाहनाअनुसार नै क्लब छाडे । अब उनी फर्कंदा वातावरण कस्तो हुन्छ भन्ने हामीले बुझ्न कठिन छ ।’

पीएसजीले नेयमारलाई यसै वर्ष छाड्ने कुनै संकेत देखिएको छैन । तर युवा फरवार्ड किलियन एमबाप्पेको उदयले नेयमारको बार्सिलोना फर्कने चाहना भने पूरा हुन सक्छ । पीएसजीका मालिक नासेर अल खेलाफी र नेयमारइच् अर्को सिजन क्लब छाड्न दिने सम्झौता रहेको छ । यसका लागि क्लबले उनलाई खरिद गर्न खर्चेको रकम भने परिपूर्ति गर्नुपर्ने छ ।

सन् २०२० मा कुनैपनि क्लबले २ सय १५ मिलियन युरो खर्चेर उनलाई अनुबन्ध गर्न सक्नेछ । त्यसअघि नेयमारले क्लब छाड्न भने खेलाडी र क्लब दुवैले नयाँ क्लबसँग सम्झौता गर्नुपर्नेछ, जुन सहज देखिँदैन । यसअघि रियल म्याड्रिडले पनि नेयमारलाई भित्र्याउने भनेपनि उनको नजर भने बार्सिलोनामै रहेको छ ।