एजेन्सी – इटालियन क्लब युभेन्ट्सले स्टार फरवार्ड क्रिस्टियानो रोनाल्डोलाई सिरी ए अन्तर्गत बुधबार हुने एटलान्टाविरुद्धको खेलमा विश्राम दिने भएको छ । सिजनको सुरुवातमा युभेन्ट्स पुगेका रोनाल्डोले लिगका सबै १७ खेलमा सुरुवात गरेका छन् ।

प्रशिक्षक मासिमिलानो एलेग्रीले रोनाल्डोलाई एटलान्टाविरुद्ध पहिलो रोजाइमा नराखिने प्रष्ट पारेका छन् । रोनाल्डोले लिगका १७ खेलमा ११ गोल गरेका छन् । उनकै प्रदर्शनको आधारमा युभेन्ट्सले लिगको १७ खेलमा १६ जित र १ बराबरीसँगै अपराजित यात्रा कायम राखेको छ । रोनाल्डो लिगको खेलमा युभेन्ट्सको पहिलो रोजाइमा पहिलो पटक नपर्ने भएका छन् ।

‘ रोनाल्डो बुधबारको खेलका लागि बेन्चमा हुनेछन्,’ एलेग्रीले खेलको पूर्व सन्ध्यामा भने, ‘उनी खेलका लागि उपलब्ध छन् । बेन्चमा रहेर मसँगै बसेर खेल हेर्नेछन् । उनले जस्तो प्रदर्शन गरेका छन् हामी सबै खुसी छौं । अब उनलाई केहि विश्राम दिएर यसै लयलाई निरन्तरता दिने सोच छ ।’ रोनाल्डोले लिगमा सम्भव १५ सय ३० मिनेटमध्ये १५ सय २० मिनेट समय मैदानमा बिताएका छन् ।

‘ हाम्रो मुख्य लक्ष्य च्याम्पियन्स लिग हो । हामीले उनलाई मार्चमा मुख्य समय भएकाले त्यसबेला सम्म उच्च प्रदर्शन गर्ने स्थितिमा राख्न चाहन्छौं,’ एलेग्रीले थपे । युभेन्ट्सले दोस्रो स्थानको नेपोलीसँग ८ अंकको फराकिलो अग्रता कायम गरेको छ । युभेले शनिबार साम्पडोरियासँग खेलेपछि इटालियन लिगमा तीन साता जाडो विश्राम हुनेछ ।

युभेन्ट्सले इटालियन सुपर कपको खेलमा मिलानको सामना गर्दै विश्रामपछि खेलमा फर्कनेछ । जनवरी १६ मा हुने खेल साउदी अरेबियामा हुनेछ ।