एजेन्सी – फिफा विश्वकप २०१८ को विजेता टोली फ्रान्सका युवा फरवार्ड किलियन एमबाप्पेले सन् २०१८ को उत्कृष्ट फ्रान्सेली खेलाडीको उपाधि जितेका छन् । उनले रियल म्याड्रिडका राफेल भारान र एन्टोइन ग्रिजमनलाई पछि पार्दै उपाधि हात पारेका हुन् ।

एमबाप्पे, ग्रिजमन र भारानले फ्रान्सलाई विश्वकप उपाधि दिलाउँदा महत्त्वपूर्ण योगदान दिएका थिए । २० वर्षीय एमबाप्पेले केहि साताअघि सम्पन्न ब्यालोन डी’ओरमा पनि मतको आधारमा चौथो स्थान हासिल गरेका थिए । उनले उत्कृष्ट युवा खेलाडी घोषित हुँदै कोपा अवार्ड पनि हात पारे ।

क्लबतर्फ एमबाप्पेको लागि सन् २०१८ निकै सुखद रहयो । उनले पेरिस सेन्ट जर्मेन (पीएसजी) बाट खेल्दै फ्रान्सेली लिग, फ्रेन्च कप र फ्रेन्च लिग कपको उपाधि दिलाउन महत्त्वपूर्ण भूमिका निर्वाह गरे । उनले सबै प्रतियोगितामा गैरे ३४ गोल गरे । पछिल्लो वर्ष चेल्सीका मिडफिल्डर एन’गोलो कान्टेले सो उपाधि जितेका थिए ।

सन् १९५९ देखि प्रदान गरिँदै आएको यस पुरस्कारलाई प्रतिष्ठित फ्रान्स फुटबल म्यागजिनले आयोजना गर्दै आएको छ । विगतमा फ्रान्समा खेल्दै आएका फ्रान्सेली खेलाडीलाई मात्र मनोनयनमा राखिने गरिएको थियो । अहिले भने अन्य लिगमा खेल्ने खेलाडीलाई पनि मनोनयन गर्ने प्रावधान रहेको छ । अवार्डको छिनोफानो उपाधिकै पूर्व विजेता र म्यागजिनको सम्पादक समूहले गर्दै आएका छन् ।