काठमाडौं (हाम्रो खेलकुद) – अखिल नेपाल फुटबल संघले पाँच वर्षको अन्तरालपछि ए डिभिजन लिग आयोजना गर्यो । रेलिगेसन विनाको लिगका दश चरणका खेल समापन भइसकेका छन् ।

लिगको तीन चरणको खेल बाँकी रहँदा उपाधिको दावेदार ७ पटकको च्याम्पियन मनाङ मर्स्याङदी  क्लब अपराजित रहँदै १० खेलबाट ३० अंक जोडेर उपाधिको संघारमा छ । लिगको ११ औं चरणमा मनाङले दोस्रो स्थानमा रहेको सिएजमी क्लब संकटाको सामना गर्नेछ । यस खेलमा जित हात पारे मनाङले लिगको दुई खेल अगावै आठौं पटक लिग च्याम्पियन बन्नेछ ।

लिगको दशौं चरण सकिँदा ८८ जना खेलाडीले गोल गर्दा लिगको गोल सङ्ख्या १६४ पुगेको छ । जसमा ४ आत्मघाती गोल समावेश छन् । रुस्लान थ्री स्टारका डिफेन्डर रन्जित धिमाल ७ गोलसहित लिगको सर्वाधिक गोलकर्ताको सुचीमा अग्रता स्थानमा रहँदा उनलाई मनाङका विदेशी खेलाडी ओलावाले ओलाडिपो अफिजले ६ गोल गरेर पछ्याइरहेका छन् । मनाङकै अन्जन विष्टको ५ गोल रहेको छ ।

लिगको एकै खेलमा सर्वाधिक ६ गोल भएको छ । सबैभन्दा ठुलो हार अन्तर भने ५–० को छ । थ्री स्टारले ब्रिगेड ब्वाइजमाथि ५–१, च्यासलले एनआरटीमाथि ५–१, आर्मीले संकटामाथि ५–१, फ्रेन्डस र जावलाखेलले ३–३ गोलको बराबरी र मच्छिन्द्रले सरस्वतीमाथि ४–२ को जित निकाल्दा ६ गोल सम्भव भएका छन् । पुलिसले फ्रेन्डसमाथि ५–० को फराकिलो जित निकालेको छ । लिगको ७० खेलमा ५७ खेलमा जितहार हुँदा १३ खेल बराबरीमा सकिएका छन् ।

यस्तोमा कुन चरणमा कति गोल भए त । हामीले यहाँ प्रस्तुत गरेका छौं :

पहिलो चरण

लिगको पहिलो चरणमा १३ गोल भयो । उद्घाटन खेलमा न्युरोड टिम एनआरटीले उपाधिको दावेदार मानिएको त्रिभुवन आर्मी क्लबलाई २–२ गोलको बराबरी रोकेको थियो । संकटाले सरस्वतीविरुद्ध र पुलिसले जावलाखेलविरुद्ध समान १–० को झिनो जित निकालेका थिए । मछिन्द्र र च्यासल तथा हिमालयन शेर्पा र एपिएफले गोलरहित बराबरी खेल्दा मनाङले ब्रिगेड ब्वाइजमाथि ३–१ को जित निकालेको थियो ।

दोस्रो चरण

लिगको दोस्रो चरणमा पनि १३ गोल नै सम्भव भयो । मनाङले एनआरटीविरुद्ध र संकटाले जावलाखेलविरुद्ध समान २–० को जित निकाल्दा आर्मीले च्यासल, एपिएफले फ्रेन्डस् तथा र शेर्पाले सरस्वतीमाथि समान १–० को जित निकाले । थ्री स्टारले ब्रिगेड ब्वाइजमाथि ५–१ को फराकिलो जित दर्ता गर्दा मच्छिन्द्रले पुलिसलाई गोलरहित बराबरीमा रोकेको थियो ।

तेस्रो चरण

लिगको तेस्रो चरणमा २२ गोल सम्भव भयो । आर्मीले संकटालाई ५–१ को फराकिलो अन्तरले पराजित गर्यो । यो चरणमा बराबरीको नतिजा निस्किएन । मनाङले थ्री स्टारलाई २–१, ब्रिगेड ब्वाइजले एपिएफलाई ३–१, आर्मीले पुलिसलाई १–०, संकटाले मच्छिन्द्रलाई २–०, सरस्वतीले फ्रेन्डसलाई ३–० ले तथा शेर्पाले जावलाखेलमाथि २–१ को जित रच्यो ।

चौथो चरण

चौथो चरणमा लिगकै सर्वाधिक २४ गोल निस्कियो । यो चरणमा आर्मीले संकटामथि ५–१ को फराकिलो जित निकाल्यो । थ्रीस्टारले एनआरटीलाई २–०, पुलिसले च्यासललाई २–०, सरस्वतीले बीबीसीलाई २–१, मनाङले एपिएफलाई २–१ र शेर्पाले मच्छिन्द्रमाथि २–० को जित निकाल्दा फ्रेन्डस् र जावलाखेलले ३–३ गोलको बराबरी खेले ।

पाँचौ चरण

पाँचौ चरणमा १७ गोल सम्भव हुँदा बराबरीको नतिजा निस्किएन । एनआरटीले पुलिसलाई ३–० मा नतिजा सुम्पियो । थ्री स्टारले एपिएफलाई २–० ले पाखा लगायो । च्यासल संकटासँग २–१ ले पराजित हुन पुग्यो । मनाङले सरस्वतीलाई २–०, फ्रेन्डसले मच्छिन्द्रलाई ३–०, आर्मीले शेर्पालाई २–१ ले तथा जावलाखेलले बीबीसीलाई १–० ले पराजित गरे ।

छैटौं चरण

लिगको छैटौं चरणमा १३ गोल निस्कियो । दुई खेल गोलरहित बराबरीमा सकियो । फ्रेन्डस र आर्मी तथा बीबीसी र मच्छिन्द्रको खेलमा गोल हुन सकेन । एपिएफले एनआरटीविरुद्ध, संकटाले पुलिसविरुद्ध र थ्री स्टारले सरस्वतीविरुद्ध समान २–१ को जित निकाले । मनाङले जावलाखेलमाथि १–० को झिनो जित निकाल्यो ।

सातौं चरण

सातौं चरणमा १४ गोल सम्भव भयो । पुलिस र शेर्पाले १–१ गोलको बराबरी खेल्दै अंक बाँडे । संकटाले एनआरटी माथि १–०, एपिएफले सरस्वतीमाथि ३–०, थ्री स्टारले जावलाखेलमाथि २–०, च्यासलले फ्रेन्डसमाथि ३–१, आर्मीले बीबीसीमाथि १–० र मनाङले मच्छिन्द्रमाथि १–० को जित दर्ता गरे ।

आठौं चरण

लिगको आठौं राउन्डमा १३ गोल सम्भव भयो । यो चरणको खेलमा बराबरीको नतिजा निस्किएन । सरस्वतीले एनआरटीमाथि १–०, संकटाले शेर्पामाथि २–०, जावलाखेलले एपिएफमाथि १–०, पुलिसले फ्रेन्डस्माथि ५–०, मनाङले आर्मीमाथि १–०, च्यासलले बीबीसीमाथि २–० र थ्री स्टारले शेर्पामाथि १–० को झिनो जित निकाले ।

नवौं चरण

लिगको नवौं राउन्डमा १७ गोल भयो । शेर्पाले एनआरटीमाथि १–० को झिनो जित निकाल्यो । सरस्वती र जावलाखेलले गोलरहित बराबरी खेले । संकटाले फ्रेन्डसलाई, एपिएफले मच्छिन्द्रलाई तथा मनाङले च्यासललाई समान ३–१ को गोलअन्तरमा हराए । पुलिस बीबीसी १–१ गोलको बराबरीमा रोकियो । यस्तै आर्मीसँग थ्री स्टार १–१ गोलको बराबरीमा रोकिबएपछि थ्री स्टारको उपाधि यात्रामा धक्का लाग्यो ।  यही चरणमा मच्छिन्द्रले गोलको खडेरी तोड्यो ।

दशौं चरण

लिगको दशौं चरणमा १८ गोल निस्कदा मनाङले उपाधि यात्रालाई थप बलियो बनायो । यही चरणमा मच्छिन्द्रले सरस्वतीलाई ४–२ ले तथा एनआरटीले जावालखेललाई २–१ ले पराजित गर्दै लिगमा पहिलो जित दर्ता गर्यो । फ्रेन्डसले शेर्पालाई २–१ ले नै हरायो । थ्री स्टार च्यासलसँग गोलरहित तथा संकटा बीबीसीसँग १–१ गोलको बराबरीमा रोकियो । एपिएफले आर्मीलाई २–१ ले पराजित गर्दै आर्मीको उपाधि यात्रा समाप्त पारिदियो । मनाङले पुलिसलाई १–० ले हरायो ।