एजेन्सी – युरोपेली च्याम्पियन रियल म्याड्रिडले लगातार तेस्रो पटक फिफा क्लब विश्वकपको उपाधि जितेको छ । शनिबार भएको फाइनलमा यूएईको अल आइनलाई ४-१ को फराकिलो अन्तरले पराजित गर्दै रियल विश्वकप विजेता बनेको हो ।

रियलका लागि खेलको १४ अौं मिनेटमा लुका मोड्रिचले गोल गर्दै सुरुवाती अग्रता दिलाएका थिए । दोस्रो हाफको ६० अौं मिनेटमा मार्कस लोरेन्टेले अग्रता दोब्बर पारे । सर्जियो रामोसले ७९ अौं मिनेटमा रियललाई ३-० ले अगाडी बढाए ।

खेलको ४ मिनेट बाँकी रहँदा सुकासा सिअोतानीले अग्रता कम गरे । तर इन्ज्युरी समयमा याह्या नादेरले अात्मघाती गोल गरेपछि रियल ४-१ ले विजयी भयो ।

रियलको यो समग्रमा चौथो क्लब विश्वकप उपाधि हो । यता रियलले शनिबारको जितसँगै प्रतियोगितामा सर्वाधिक जितको कीर्तिमान पनि आफ्नो नाम गरेको छ । यसअघि बार्सिलोना र रियलले समान खेल जितेका थिए । मिडफिल्डर टोनी क्रुसले पछिल्ला ६ विश्वकपमध्ये ५ उपाधि आफ्नो नाम गरेका छन् । सन् २०१३ मा बायर्नबाट उपाधि जितेका क्रुसले सन् २०१५ बाहेकका सबै उपाधि जितेका छन् ।

त्यसअघि भएको तेस्रो स्थानको खेलमा अर्जेन्टिनी क्लब रिभर प्लेटले जापानको काशीमा एन्टलर्सलाई ४-० ले पराजित गर्दै उपाधि जितेको थियो । रिभर प्लेटको जितमा क्लबका लागि अन्तिम खेल खेलिरहेका गोन्जालो मार्टिनेजले २ गोल गरे ।

प्रतियोगिताको उत्कृष्ट खेलाडी तथा सर्वाधिक गोलकर्ताको उपाधि रियलका ग्यारेथ बेलले जिते । उनले २ खेलमा ३ गोल गरेका थिए । सिल्भर बल अल आईनका कैओले पाउँदा ब्रोन्ज बल रिभर प्लेटका सान्टोस बोरेले पाए । रियल म्याड्रिडले फेयर प्ले अवार्ड पनि प्राप्त गर्यो ।