काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शनिबार पहिलो खेलमा रुस्लान थ्री स्टार क्लब र भ्याली च्यासल युवा क्लब भिड्दैछन् ।

च्यासल पहिलो पटक ए डिभिजन लिगमा खेलिरहेको छ । दुवै क्लब ललितपुरको पाटनमा अवस्थित छन् । च्यासल क्लब ए डिभिजन लिगकै सबैभन्दा कान्छो क्लब पनि हो । च्यासलले लिगमा ठूला खेलाडी अनुबन्ध गर्दै उपाधिको दावेदारी पनि देखाएको थियो । तर खराब सुरुवात पाएपछि च्यासलले अहिले शीर्ष ४ लाई आफ्नो मुख्य लक्ष्य बनाएको छ ।

यता थ्री स्टार पछिल्लो खेलमा आर्मीसँग बराबरीमा रोकिएपछि उपाधि सम्भावनाबाट टाढीएको छ । तेस्रो चरणमा मनाङसँग पराजित भएपछि थ्री स्टारको उपाधि लक्ष्यमा धक्का पुगेको छ । पछिल्लो खेलमा पनि थ्री स्टार जितअन्जिक पुग्दा इन्ज्युरी समयमा जर्जप्रिन्सको फ्रिकिकले आर्मीलाई एक अंक दिलाएको थियो ।

शनिबारको खेलमा च्यासलका सन्तोष साहुखल उपलब्ध हुने छैनन् । उनी जापान फर्किसकेका छन् । च्यासलको अग्रपंक्ति थ्री स्टारका पूर्व फरवार्ड एल्भिसले सम्हाल्नेछन् । च्यासलको कप्तानी पनि थ्री स्टारकै पूर्व डिफेन्डर देवेन्द्र तामाङले सम्हालेका छन् । च्यासलले आफ्नो शीर्ष ४ मा आउने सम्भावना बलियो बनाउन जित दर्ता गर्नुपर्ने छ । थ्री स्टारले भने उपाधि जित्ने सम्भावना जीवित राख्न जित दर्ता गर्नुपर्ने समीकरण रहेको छ ।