अबुधाबी (एजेन्सी)– रियल म्याड्रिडका फरवार्ड ग्यारेथ बेलले प्रशिक्षकले दिने जुन सुकै भूमिकामा पनि आफु खेल्न तयार रहेको बताएका छन् । बेलको ह्याट्रिकसँगै काशीमा एन्टलर्सलाई ३–१ ले हराउँदै बुधबार रियल म्याड्रिड क्लब विश्व कपको फाइनलमा पुगेको थियो । उनले बुधबार लेफ्ट विङ्सबाट खेलेका थिए ।

टोटेनह्याममा हुँदा देखि नै बेल तीब्रगतिका विङ्गर थिए । तर, स्पेनिस क्लबमा पुगेयता उनले राइट विङ्स र सेन्टरबाट पनि खेल्नु परेको थियो । रोनाल्डोले लेफ्ट विङ्सबाट खेल्दा बेलले आफ्नो बलियो पोजिसनमा खेल्ने अवसर पाएका थिएनन् । वेल्सका कप्तान समेत रहेका बेलले आफुलाई लेफ्टमा खेल्न बढी सहज हुने बताएका छन् । यद्दपी उनले फरवार्ड वा अरु कुनै भूमिकामा पनि आफुलाई फरक नपर्ने र टोलीको जितका लागि कोसिस गर्ने बताएका छन् ।

‘मैले खेल जीवनको अधिकांश समय लेफ्ट विङ्सबाट खेले । मलाई त्यहि खेल्न सहज लाग्छ,’ उनले भने, तर, म राइटमा पनि खेल्न सक्छु । लेफ्ट वा सेन्टरमा पनि मलाई केहि समस्या छैन । प्रशिक्षकको आवश्यकता अनुसार म खेल्न तयार छु । गोल गर्दा खुसी लागेको उल्लेख गर्दै बेलले टोलीलाई सहयोग गर्नु र फाइनल पुग्नु महत्वपूर्ण भएको बताएका छन् ।

‘यो हाम्रो लागि महत्वपूर्ण जित हो । खेलमा हामीलाई कठिन हुन्छ भन्ने थाहा थियो । तर हामीले राम्रो खेल्ने प्रयास गर्यौ र फाइनल पुग्यौं ,’ बेलले भने, ‘यो अर्को उपाधि हो । क्लबका लागि उपाधि जित्नु सधै महत्वपूर्ण हुन्छ । खेलाडी सबैले सामूहिक प्रदर्शन गरेका छन् । ‘