काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बुधबार रुस्लान थ्री स्टार क्लबले त्रिभुवन आर्मी क्लबको खेल १-१ को बराबरीमा सकिएको छ । थ्री स्टारका लागि निराजन खड्काले र आर्मीका जर्जप्रिन्स कार्कीले गोल गरे ।

खेलको १६औं मिनेटमा अवाङ अल्वर्टको पासमा अजायी मार्टिन्सको प्लेसिङ प्रहार पोष्टबाट थोरै बाहिरयो । १८औं मिनेटमा आर्मीका सन्तोष तामाङको प्रहार पोष्टबाट थोरै बाहिरियो ।

३०औं मिनेटमा थ्रीस्टारका मिक्चेन तामाङको फ्रिकिक गोलरक्षकले बचाए । ३७औं मिनेटमा सन्तोष तामाङको प्रहारले पोष्टको दिशा लिन सकेन। ४५औं मिनेटमा सन्तोषको फ्रिकिक गोलरक्षकले बचाए ।

दोस्रो हाफको ७० औं मिनेटमा थ्री स्टारले अग्रता लियो । पिटर सेगुनको पासमा अजायी मार्टिन्सले पेनाल्टी क्षेत्रभित्र दिएको पासमा निराजन खड्काले हाफ भलीमा गोल गर्दै अग्रता दिलाए । जर्जप्रिन्स कार्कीले इन्ज्युरी समयको चौथो मिनेटमा गोल गर्दै आर्मीलाई बराबरीमा ल्याए ।

त्यसअघि ५४औं मिनेटमा टेक बहादुर बुढाथोकीको प्रहार थ्री स्टारका गोलरक्षक एलन न्यौपानेले बचाउ गरे । ५६औं मिनेटमा मार्टिन्सको पासमा रन्जन विष्टको प्रहार बाहिरियो । ६९औं मिनेटमा आर्मीका सन्तोष तामाङको फितलो प्रहारले पोस्टको दिशा लिन सकेन । ८७औं मिनेटमा थ्री स्टारका अनिल गुरुङले वान भर्सेस वानमा गोल गर्न सकेनन् । उनको प्रहार पोलमा लागेर फर्कियो ।

यस बराबरीसँगै थ्री स्टार अंक तालिकाको तेस्रो स्थानमा अडिएको छ । थ्री स्टारले ९ खेलमा ७ जित, १ बराबर र १ हारसहित २२ अंक जोडेको छ । संकटा २४ अंक जोड्दै दोस्रो स्थानमा छ । मनाङ ९ खेलमा २७ अंकसहित शीर्षस्थानमा छ । आर्मी भने ९ खेलमा ५ जित, ३ बराबर र १ हारसहित १८ अंक बोकेर चौथो स्थानमा छ ।