काठमाडौं (हाम्रो खेलकुद)– पल्सर सहिद स्मारक ए डिभिजन लिगमा शनिबारको पहिलो खेलमा च्यासल युथ क्लबले जित हासिल गरेको छ । हलचोकस्थित शसस्त्र प्रहरी बलको मैदानमा च्यासलले ब्रिगेड ब्वाइज क्लब (बिबिसी) लाई २–० ले हराएको छ ।

दोस्रो हाफमा सन्तबहादुर गुरुङ र सन्जोक राईले गरेका गोलमा च्यासल विजयी भएको थियो । जितसँगै च्यासल अंकतालिकाको छैटौं स्थानमा स्थानमा उक्लेको छ । च्यासलको १३ अंक पुगेको छ । सन्तले ६५ औं मिनेटमा गोल गर्दै च्यासललाई अघि बढाएका थिए । छिरिङ गुरुङको कर्नरमा सन्तले हेडमार्फत गोलग रेका थिए ।

खेल सकिन ८ मिनेट बाँकी रहँदा सन्जोकले टोलीका लागि दोस्रो गोल गरेका थिए । सन्तोष साहुखलले दिएको पासमा अनमार्क सन्जोकले सहजै गोल गरेका थिए । इन्जुरी समयको पहिलो मिनेटमा च्यासलका सन्तको प्रहार बिममा लागेर फर्केपछि गोलअन्तर बढ्न पाएन । च्यासलले १० खेलाडीमा सिमित हुँदै खेलको अन्त्य गरेको थियो ।

८५ औं मिनेटमा दोहोरो पहेलो कार्डपछि रातो कार्डको दर्शन गर्दै सन्तोष साहुखल मैदान बाहिएका थिए । सिग्नेचर मनाङ मस्र्याङ्दी क्लब २४ अंकका साथ शीर्षस्थानमा रहेको थियो । दोस्रो स्थानमा रहेको सिएमजी क्लब संकटाको २१, रुस्लान थ्री स्टार क्लबको २१, त्रिभुवन आर्मी क्ल्बको १७, नेपाल पुलिस क्लबको १४ अंक छ । आठौं चरणको अन्तिम खेलमा आज रुस्लान थ्री स्टार क्लब र मच्छिन्द्र क्लबबीच प्रतिस्पर्धा हुनेछ ।।