काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबारको खेलमा मनाङ मर्स्याङदी क्लबले त्रिभुवन आर्मी क्लबलाई १-० ले पराजित गरेको छ । विशाल राईको पहिलो हाफको गोलमा मनाङले १-० को जित दर्ता गरेको हो ।

मनाङका लागि विशाल राईले ३१ औं मिनेटमा गोल गरेका हुन् । हेमन गुरुङलाई आर्मीका खेलाडीले फल हानेपनि रेफ्रीले एडभान्टेज दिएपछि आडेलाजा सोमिडेको पासमा विशालले गोल गरेका हुन् ।

पहिलो हाफको अन्तिम मिनेटमा जर्जप्रिन्स कार्कीको प्रहारलाई गोलरक्षक विशाल श्रेष्ठले विफल तुल्याए । लगत्तै ओलावाले आफिजले वन भर्सेस वनको अवसर सदुपयोग गर्न सकेनन् ।

दोस्रो हाफमा आर्मीले दबाब बनाएपनि गोल गर्न सकेन । ५३ औं मिनेटमा जर्जप्रिन्स कार्कीको प्रहार बाहिरियो । लगत्तै जितेन्द्र कार्कीले पनि अवसर सदुपयोग गर्न सकेनन् । ५८ औं मिनेटमा भारतको क्रसमा नवयुगको हेडरले पोस्टको दिशा लिन सकेनन् ।

७६ औं मिनेटमा मनाङले अग्रता दोब्बर गर्ने अवसर गुमायो । भिक्टरको प्रहार पोस्टमा लागेर बाहिरिएको थियो । ८० औं मिनेटमा विकास खवासको प्रहार पनि पोस्टभन्दा थोरै बाहिर गयो ।

यस जितसँगै मनाङले शीर्ष स्थानमा ३ अंकको अग्रता कायम नै गरेको छ । मनाङले लगातार आठौं जित दर्ता गर्दै २४ अंक जोडेको छ । आर्मी भने ८ खेलमा ५ जित, २ बराबरी र १ हारसँगै १७ अंकमा नै सिमित छ । आर्मी अंक तालिकाको चौथो स्थानमा छ । दोस्रो स्थानमा रहेको संकटाको २१ अंक छ भने रुस्लान थ्री स्टार १८ अंकमा छ ।