मड्रिड (एजेन्सी) – डिफेन्डिङ च्याम्पियन स्पेनिस क्लब रियल मड्रिड युइएफए च्याम्पियन्स लिग फुटबलको समूह चरणको अन्तिम खेलमा रसियन क्लब सिएसकेए मस्कोसँग स्तब्ध बनेको छ । रियल मस्कोसँग घरेलु मैदानमा ३–० ले स्तब्ध बनेको हो ।

मस्कोसँगको हारले पनि रियल समूह ‘जी’ बाट समूह विजेताको रुपमा नकआउट चरणमा पुग्न सफल भयो । मस्को भने प्रतियोगिताबाट बाहिरिसकेको थियो । रियलले ६ खेलबाट १२ अंक जोड्न सफल भयो । मस्कोले ७ अंक जोड्यो ।

च्याम्पियन्स लिग फुटबलमा रियलले घरेलु मैदानमा पहिलो पटक फराकिलो हार बेहोर्यो । यस्तै रियलले सन् २००८ पछि पहिलोपटक होम र अवे खेलमा पराजित हुन पुग्यो । सन् २००८ मा रियल युभेन्टससँग दुवै खेलमा पराजित भएको थियो । रियल पहिलो लेगमा मस्कोसँग १–० ले परािजत भएको थियो ।

सान्टियागो बर्नबेउमा बुधबार राति भएको खेलमा पाहुना टोली मस्कोले पहिलो हाफमै २–० को अग्रता बनाएको थियो । ३७औं मिनेटमा फेडर चालभले गोल गर्दै मस्कोलाई खेलमा अग्रता दिलाएका थिए ।

उनले अर्नर सिगुर्डसनको पासलाई गोलमा परिणत गरेका थिए । ४३औं मिनेटमा जर्जी सेचेनीकोभले मारियो फर्नान्डेजको पासललाई सदुपयोग गर्दै मस्कोलाई २–० को अग्रता दिलाएका थिए ।

त्यसअघि २४औं मिनेटमा मार्काे एसेन्सियोको प्रहार बारमा लागेर फर्कदा रियलले खेलमा अग्रता लिने मौका खेर फालेको थियो । २८औं मिनेटमा इस्को, २९ां मिनेटमा एसेन्सियो र ३०औं मिनेटमा बेन्जेमा गोल गर्न बाट चुकेको थियो ।

पहिलो हाफमा २–० ले पछि परेको रियलले बलमा नियन्त्रण गरेपनि गोल गर्न असमर्थ रह्यो । ७३औं मिनेटमा अर्नर सिगुर्डसनले गोल गर्दै रियललाई घरेलु मैदानमा ३–० को हार चखाए । रियलले मस्कोविरुद्ध १९ पोस्ट आक्रमण बुनेपनि गोल गर्न सकेनन् ।

यही समूहको अर्काे खेलमा रसियन क्लब भिक्टोरिया प्लेजेनले इटालियन क्लब रोमालाई २–१ ले पराजित गरेको छ । प्रतिस्पर्धात्मक खेलमा तीन गोल नै दोस्रो हाफमा सम्भव भएको थियो ।

६२औं मिनेटमा जान कोभारिकले गोल गर्दै घरेलु टोलीलाई सुरुवाती अग्रता दिलाएका थिए । ६८औं मिनेटमा रोमाका सेन्जिज अनडरले बराबरी गोल फर्काएका थिए । ७२औं मिनेटमा थोमर चोरेले गोल गर्दै भिक्टोरियालाई २–१ को जित दिलाए ।

हारपछि पनि रोमा समूहको उपविजेताको रुपमा अन्तिम १६ मा पुग्न सफल भएको छ ।