काठमाडौं (हाम्रोे खेलकुद) – पल्सर ए डिभिजन लिगका आधा भन्दा बढी खेल सकिएका छन् । बिहीबारबाट आठौं चरणका खेल सुरु हुँदैछ । तर, सात चरणको खेल सकिदा सम्म राष्ट्रिय टोलीका नियमित सदस्य अनन्त तामाङ खेलेका छैनन् । ए डिभिजन लिगमा उनले कहिले डेब्यू गर्ने अझै निश्चित छैन ।

चोट र अनफिट भएर भने उनी मैदान बाहिर रहेका भने होइनन् । उनी आफ्नै कमजोरी र अखिल नेपाल फुटबल संघ (एन्फा) ले निर्णय लिन नसक्दा लिगमा डेब्यू गर्नबाट बञ्चित भइरहेका छन् । नेपालका दुई चर्चित क्लब सिग्नेचर मनाङ मस्र्याङ्दी क्लब र रुस्लान थ्री स्टार क्लबबाट सम्झौता गरेका कारण अनन्त अहिले आफै खेल्नबाट बञ्चित भएका हुन् ।

दुवै टोलीले अनन्तले आफ्नो क्लबबाट सम्झौता गरेको दाबी प्रस्तुत गरेपछि उनी लिग खेल्नबाट बञ्चित भएका हुन् । अनन्तले गत वर्ष भने थ्री स्टारबाट खेलेका थिए । तर गतवर्ष लिग फुटबल हुन सकेन । थ्री स्टारसँगको लिगका लागि सम्झौता हुँदा हुँदै उनले यस वर्ष लिगका लागि मनाङमा सम्झौता गरेपछि विवाद सुरु भएको थियो । एउटा खेलाडीले दुइटा क्लबबाट सम्झौता गरेमा एक वर्ष कारवाही गर्ने एन्फाको प्रतियोगिता नियमावलीमा छ ।

कुनैपनि क्लबले नयाँ खेलाडी अनुबन्धन गर्दा पुरानो क्लबको रिलिज लेटर (फुकुवा गरेको प्रमाणपत्र) चाहिने गर्छ । मनाङले भने उक्त प्रमाणपत्र बिना नै अनन्तलाई अन्तरिक अनुबन्धन गरेको थियो ।

तर, न त एन्फाले उनलाई कारवाहीको निर्णय गरेको छ र न त दुई क्लबबीच सहमति जुटाउन सकेको छ । भनिन्छ, ढिलो न्याय दिनु भनेको न्याय नदिनु बराबर हो । अनन्तको विषयमा एन्फाले त्यहि भूमिका निर्वाह गरिरहेको छ । लिग सुरु भएको अढाई महिना भन्दा लामो समय बित्दा पनि एउटा खेलाडीको विषयमा एन्फा निर्णय लिनबाट चुकिरहेको छ ।

एन्फाका प्रवक्ता किरण राईले दुवै क्लबमा सम्झौता गरेकै कारण अनन्तले खेल्न नपाएको बताए । औपचारिक रुपमा क्लबहरुबाट वा खेलाडीबाट एन्फामा निवेदन परेको छैन, उनले भने, समस्या आइसकेपछि हामीले नै दुई क्लबलाई अन्तरिक रुपमा मिल्न भन्यौं । तर, त्यस्तो सहमति हुन सकेन । यस्तो अवस्था रहे उनले खेल्ने सम्भावना कम छ ।

पछिल्लो समय अनन्त राष्ट्रिय टोलीमा नियमित खेलिरहेका छन् । नेपालको रक्षापंक्तिमा उनको प्रदर्शनले नै निर्णायक भूमिका खेल्दै आएको छ । युवा उमेरमा नै उनले आफूलाई राष्ट्रिय टोलीको खम्बाको रुपमा स्थापित गरेका छन् । तर यो अवस्थामा लिग फुटबल नै नखेल्दा उनको प्रदर्शनमा पनि असर पर्न सक्छ ।