एभर्टन (एजेन्सी) – इन्ज्युरी समयको थप गरिएको छैटौ मिनेटमा लुकास डिग्नेले गोल गरेपछि एभर्टन इंग्लिस प्रिमियर लिग फुटबलमा हारबाट जोगिएको छ । एभर्टन र वाटफोर्डले २–२ गोलको बराबरी खेलेको हो ।

घरेलु मैदान गुडिसन पार्कमा भएको खेलमा एभर्टनले १५औं मिनेटमा रिचार्लीसनको गोलबाट अग्रता बनाएको थियो । रिचार्लीसनले आन्द्र गोमेजको पासलाई सदुपयोग गरेका थिए ।

पहिलो हाफमा १–० को अग्रता बनाएको एभर्टनले दोस्रो हाफमा दुई मिनेटमा अन्तरमा दुई गोल बेहोरेपछि खेलमा २–१ ले पछि परेको थियो । ६३औं मिनेटमा सिमस कोलेम्यानले आत्मघाती गोल गरेपछि खेल १–१ गोलको बराबरीमा पुगेको थियो । त्यसको दुई मिनेट पछि नै अब्दुलाय डौकौरेले गोल गरेपछि एभर्टन खेलमा पछि परेको थियो ।

६८औं मिनेटमा एभर्टनले पेनाल्टीमार्फत बराबरी गोल गर्ने मौका पाएपनि गोल गर्न असमर्थ रह्यो । एभर्टनका सिगुर्डसनको प्रहार वाटफोर्डका गोलरक्षक विन फोस्टरले बचाएका थिए । हार तर्फ उन्मुख खेलको इन्ज्युरी समयको थप गरिएको छैटौ मिनेटमा लुकास डीग्नेले फ्रिकिकमार्फ दर्शनीय गोल गर्दै खेललाई २–२ गोलको बराबरीमा ल्याए । उनी यसै सिजनको सुरुवातमा बार्सिलोनाबाट एभरटन आएका थिए ।

बराबरीसँगै एभर्टन २४ अंकसहित तालिकाको सातौ स्थानमा रहेको छ । २१ अंकसहित वाटफेर्ड १२औं स्थानमा छ । ४२ अंक रहेको लिभरपुल शीर्षस्थानमा रहँदा ४१ अंक रहेको सिटी दोस्रो स्थानमा छ ।