म्युनिख (एजेन्सी)– जर्मनीका मुख्य प्रशिक्षक जोचिम लोले भविष्यमा रियल म्याड्रिड जस्तो क्लबलाई प्रशिक्षण दिन सक्ने संकेत गरेका छन् । रियल अहिले स्पेनिस ला लिगामा पाँचौं स्थानमा रहेको छ ।

विश्वकप सुरु हुनु केहि दिन अघि प्रशिक्षकमा नियुक्त भएका तत्कालिन स्पेनी राष्ट्रिय टोलीका प्रशिक्षक जुलेन लोपेटेगुइलाई रियलले सिजनको सुरुवाती समयमै बर्खास्त गरेको थियो । अहिले सान्टियागो सोलारीलाई मुख्य प्रशिक्षक बनाउँदै रियल लयमा फर्कने कोसिसमा छ ।

लो सन् २००४ देखि जर्मन टोलीको प्रशिक्षण टोलीमा रहेका छन् । २००६ देखि उनी टोलीको मुख्य प्रशिक्षकका रुपमा काम गरिरहेका छन् । उनले भविष्यमा रियल जस्तो क्लबलाई प्रशिक्षण दिन सक्ने बताएका छन् । उनकै नेतृत्वमा जर्मनीले सन् २०१४ को फिफा विश्वकप उपाधि पनि जितेको थियो ।

‘म लामो समयदेखि प्रशिक्षणमा रहेको छु । अहिले पनि मैले सन्यासको विषयमा सोचेको छैन,’ लोले अन्तर्वार्तामा भने, ‘मेरो प्रशिक्षण जीवनको लामो समय राष्ट्रिय टोलीमा बित्यो । तर जब समय आउछ अनि क्लबका विषयमा सोच्नेछु । भविष्यमा क्लबलाई प्रशिक्षण दिन म इच्छुक छु ।’

उनले जर्मनी भन्दा बाहिर गएर प्रशिक्षण गर्न चाहेकेको बताएका छन् । ‘म जर्मनीमा होइन बाहिर प्रशिक्षण दिन चाहन्छु,’ उनले थपे, ‘जो सुकै प्रशिक्षकले पनि रियल जस्तो टोलीलाई प्रशिक्षण दिन चाहन्छन् ।’ जर्मनीलाई २०१४ को विश्व कप उपाधि दिलाएका लो पछिल्लो विश्व कपमा कमजोर प्रदर्शनका वावजुद पनि टोलीमा यथावत छन् ।