मिलान (एजेन्सी)– एमएलएस टोली एलए ग्यालेक्सी ज्लाटान इब्राहिमोभिचको अनुरोध स्वीर्न तयार भएपनि उनी तत्काल एसी मिलान नफर्कने निर्देशक लियोनार्दोले बताएका छन् ।

ग्यालेक्सीमा सम्झौता बाँकी हुँदाहुँदै ३७ वर्षे स्ट्राइकर पुरानो क्लब फर्कने चर्चा सुरु भएको थियो । तर, अमेरिकी क्लब नयाँ प्रस्तावका साथ इब्राहिमोभिचलाई क्लबमै राख्न सफल भएको बताएको छ । उनी अब सम्झौता अवधीभर ग्यालेक्सीमै रहने जनाइएको छ ।

‘उनी नयाँ प्रस्तावबाट सन्तुष्ट हुन सके, ग्यालेक्सीमा रहने वचन दिएका थिए । त्यहि अनुरुप भएको छ,’ लियोनार्दोले भने, ‘उनी आउने विषय टोलीका लागि उत्साहजनक थियो । तर, तत्काल त्यो सम्भव छैन ।’ ग्यालेक्सीको सिजन अक्टुबरमै अन्त्य भइसकेको छ ।

नयाँ सिजन सन् २०१९ को मार्चमा मात्र सुरु हुनेछ । तर त्यो बीचमा इब्राहिमोभिच लोनमा मिलान जान सक्ने सम्भावना भने रहेको बताइएको छ । जसरी २००९ मा डेभिड बेकह्याम गएका थिए ।

इब्राहिमोभिचले अमेरिकामा पहिलो सिजन उत्कृष्ट ढंगमा बिताएका थिए । उनले २७ खेलमा २२ गोल गरेका थिए । त्यस्तै उनी वेस्ट न्युकमर अफ दी अवार्डबाट पनि सम्मानित भएका थिए । यद्दपी उनी टोलीलाई प्ले अफमा छनोट गराउन असफल भएका थिए ।