एजेन्सी – वेल्स फरवार्ड ग्यारेथ बेलको एकमात्र गोलमा रियल म्याड्रिडले आइतबार स्पेनिस ला लिगाको खेलमा हुएस्कालाई १-० ले पराजित गरेको छ ।

बेलले खलेको आठौँ मिनेटमा गोल गर्दै रियललाई खेलमा अग्रता दिलाएका थिए । उनले भलीमार्फत गोल गर्दी गोलविहिन १० खेलको यात्रामा पूर्णविराम लगाए । रियलले निकै संघर्ष गरेको खेलमा बेलको दोस्रो हाफको प्रयास भने सफल हुन सकेन ।

हुएस्काले पनि दोस्रो हाफमा प्राप्त गरेको अवसर सिर्जना गर्न सकेन । आक्रमणमा रियल भन्दा धेरै अवसर सिर्जना गरेको हुएस्काले फिनिस गर्न नसक्दा खेलमा पराजय भोग्नुपर्यो । मोइ गोमेजको फ्रिकिकल थिबाउट कोर्टुवाले पन्च गरेर बाहिर फ्याँके । त्यसै कर्नरमा ड्यानी कार्भाजलले क्रिस्टियन रिभेराको प्रयासलाई गोललाइन बाट क्लियर गरिदिए ।

दोस्रो हाफमा रियलले जम्मा दुई पटक पोस्टमा आक्रमण गर्यो । रियलको अग्रपंक्ति सम्हालिरहेका फरवार्ड करीम बेन्जेमाले खेल अवधिभर एक पटक पनि पोस्टमा आक्रमण गर्न सकेनन् ।

रियलको जितमा गोलरक्षक थिबाउट कोर्टुवाले भने उत्कृष्ट प्रदर्शन गरे । लगातार तेस्रो क्लिन सिट राख्ने क्रममा उनले ९२ औं मिनेटमा पनि गोमेजको शक्तिशाली प्रहारलाई निस्तेज पारे ।

यस जितसँगै सान्टियागो सोलारीको टोली बार्सिलोनाभन्दा ५ अंक पछाडी रहँदै लिगको शीर्ष ४ मा अटाएको छ । रियलको १५ खेलमा २६ अंक रहेको छ । रियलले अब बुधबार हुने च्याम्पियन्स लिग खेलमा सीएसकेए मस्कोको सामना गर्नेछ । रियल समूह विजेता बन्दै दोस्रो चरण पुगिसकेको छ ।